Ռուսաստանի ԱԳՆ հատուկ ներկայացուցիչ Մարիա Զախարովան, արձագանքելով ԱՄՆ փոխպետքարտուղար Ջեյմս Օ’Բրայենի հայտարարությանը, թե Հայաստանի բնակչության մեծ մասը ցանկանում է դիստանցավորվել Ռուսաստանից, հայտարարել է, որ ՌԴ և ՀՀ դարավոր կապերը կդիմանան բոլոր փորձություններին։
Նա նաև մերկապարանոց է անվանել ԱՄՆ այն հայտարարությունները, թե ՀՀ–ն ուզում է երես թեքել ՌԴ–ից, գրում է ՌԻԱ Նովոստին։
«Օ’Բրայենը և նրա թիմակիցները պետք է հասկանան մի պարզ բան՝ մեր երկրների միջև դարերի ընթացքում ձևավորված կապերը կդիմանան Արևմուտքի բոլոր փորձություններին։ Պատմության ընթացքում մենք բազմիցս աջակցել ենք եղբայրական հայ ժողովրդին և մտադիր ենք դա անել նաև ապագայում»,- ասել է Զախարովան։
Նա հավելել է, որ Արևմուտքն ապակառուցողական քաղաքականություն է վարում Հարավային Կովկասում, որի նպատակը տարածաշրջանի հատվածականացումն է, Մոսկվայի հետ պատմական կապերի փլուզումը։
Մեկնաբանելով Օ’Բրայենի խոսքերը՝ Զախարովան ասել է, որ «ԱՄՆ պաշտոնյաների նման անկեղծ խոստովանություններն անշուշտ ուշադրության են արժանի, սակայն զարմանալի չեն, քանի որ Օ՛Բրայենը ոչ մի նոր բան չի ասել»։
«Նա միայն հաստատել է այն, ինչի մասին մենք մշտապես խոսում և զգուշացնում ենք մեր գործընկերներին, այդ թվում՝ Երևանում, այն է՝ Արևմուտքն ապակառուցողական քաղաքականություն է վարում Հարավային Կովկասում՝ ձգտելով խարխլել ՌԴ պատմական կապերը նրա ավանդական դաշնակիցների և հարևանների հետ»,–ասել է Զախարովան։
Եվրոպայի ու Եվրասիայի հարցերով փոխպետքարտուղար Ջեյմս Օ’Բրայենը Սենատում լսումների ժամանակ ողջունել էր ՀՀ վարչապետ Նիկոլ Փաշինյանի «համարձակ քայլերը» Ռուսաստանից դիստանցավորվելու առումով։ Նա նշել էր, որ ԱՄՆ–ն աշխատում է այնպիսի պայմանների ստեղծման վրա, որոնք թույլ կտան Հայաստանին հրաժարվել ՌԴ հետ ավանդական ամուր հարաբերություններից: Նա նշել է նաև, որ իրադարձությունները Լեռնային Ղարաբաղում «զգալի խզում են առաջացրել և Հայաստանի բնակչության զգալի մասը ցանկանում է դիստանցավորվել ՌԴ–ից»։
