Ադրբեջանն ու Իսրայելը ռազմական ոլորտում գործակցության հուշագիր են ստորագրել

PanARMENIAN.Net - Ադրբեջանն ու Իսրայելը ռազմական ոլորտում համագործակցության մասին հուշագիր են ստորագրել։ Այդ մասին հայտնել է Ադրբեջանում Իսրայելի դեսպան Ջորջ Դիկը։

Իսրայելյան AS Holdings–ն ու նրա դուստր ձեռնարկություն Ari Arms–ը, որը մասնագիտացած է ՆԱՏՕ–ի չափանիշներով թեթև զենքի մշակման և արտադրության ոլորտում, հուշագիր է ստորագրել ռազմավարական փոխըմբռնման մասին «Ազերսիլահի» հետ, որը ենթակա է Ադրբեջանի պաշտպանության նախարարությանը, գրում է APA-ն։

«Այս անփոխարինելի գործընկերությունը մերձեցնում է երկրներին, նպաստում է համատեղ զարգացմանն ու անկախության և ազգային անվտանգության ամրապնդման ջանքերին։ Ստորագրման արարողությանը մասնակցել են տարբեր պաշտոնյաներ, նախարարությունների ներկայացուցիչներ»,–նշել է դեսպանը։

Թուրքիայի նախագահականի ռազմարդյունաբերության վարչությունը հայտարարել է, որ Ադրբեջանի և թուրքական ռազմարդյունաբերական ընկերությունների միջև նոր համաձայնագրեր են ստորագրվել: