Դեկտեմբերի 23-ին Երևանում կկայանա Մհեր Մկրտչյանին նվիրված ֆիլմի պրեմիերան

PanARMENIAN.Net - Դեկտեմբերի 23-ին Երևանի «Մոսկվա» կինոթատրոնում կկայանա համաժողովրդական սեր վայելող դերասան Մհեր Մկրտչյանին նվիրված «Էն ուրիշ Ֆրունզիկը» ֆիլմի պրեմիերան: Այդ մասին PanARMENIAN.Net ի թղթակցին հաղորդել են կինոթատրոնում:

«Էն ուրիշ Ֆրունզիկը» ֆիլմում ԽՍՀՄ ժողովրդական արտիստ Մհեր Մկրտչյանը ներկայանում է նոր կերպարով` որպես ուրիշ Ֆրունզիկ` իր մտորումներով աշխարհի և մարդկանց մասին և որ ամենակարևորն է` իր յուրահատուկ մոտեցմամբ դերի մեջ մտնելու հարցում:

Ֆիլմի համահեղինակներ Հովհաննես Պապիկյանն ու Շուշանիկ Սահակյանը 2010թ. փետրվարից ուսումնասիրում էին արխիվային նյութերի հսկայական քանակը, Մկրտչյանի եզակի ձայնագրություններն ու հարցազրույցները, որոնք նա տվել էր տարբեր առիթներով և 40 րոպեանոց վավերագրական ֆիլմ պատրաստել: Այնուհետև նրանք այդ ֆիլմի մեջ ընդգրկել էին նաև բացառիկ ձայնագրություններ, որոնք որակով ավելի թույլ էին, բայց լի էին այնպիսի խորությամբ ու իմաստով, որ անհնար էր հրաժարվել դրանցից` չթերանալով Մհեր Մկրտչյանի լիարժեք կերպարի ստեղծման հարցում: Արդյունքում ֆիլմը, համալրվելով մանրամասներով, դարձավ 65 րոպեանոց:

«Էն ուրիշ Ֆրունզիկը» ֆիլմը հիմնականում բաղկացած է այն տեսարաններից, որոնք մինչ այդ, ըստ էության, կադրի ետևում են մնացել: