«ՀԱՄԱՐ ԵՐԿՈՒ ԱՀԱԲԵԿՉԻ» ԲԱՔՎԻ ՀԵՏՔԸ

PanARMENIAN.Net - Հայտնի է, որ Այմոն Ալ-Զավախիրիի ստեղծած «Իսլամական ջիհադ» ահաբեկչական կազմակերպությունն Ադրբեջանում բջիջ է հիմնել 1992թ.-ին, երբ ղարաբաղյան հակամարտության գոտում սկսվեցին լայնածավալ ռազմական գործողություններ: Ընդ որում, Բաքվի մասնաճյուղն ահաբեկչական ամենամեծ ցանցերից էր: «Ուոլ Սթրիր Ջըրնըլ»-ի տվյալներով, մասնաճյուղը գործում էր «Bavari-C» առեւտրային ընկերության հովանավորության ներքո, որն Ադրբեջանի իրավապահ մարմինների ուշադրության կենտրոնում էր: Քենիայում դեսպանատան պայթյունի գործի բացահայտման աշխատանքների համաձայն, 1996-1998թ.թ.-ի ընթացքում Ուսամա բեն Լադենը 60 անգամ կապնվել է Բաքվի հետ եւ բանակցություններ է վարել տեղական իր ներկայացուցիչների հետ: 1998թ.-ին Ալ-Զավախիրին Բաքվի մասնաճյուղին վստահել է Քենիայում եւ Տանզանիայում ամերիկյան դեսպանատների պայթեցման օպերացիայի խիստ կարեւոր մասը: Հետաքննության նյութերի համաձայն, Նայրոբիում ԱՄՆ դեսպանատան պայթեցման մասին հրաման-ֆաքսը ստացվել է հենց Բաքվից: 2000թ.-ին ԱՄՆ-ի հատուկ ծառայությունների ջանքերի շնորհիվ Բաքվի բջիջը չեզոքացվեց: Ադրբեջանի մայրաքաղաքում ամերիկացիները հետեւցին եւ չեզոքացրին «Իսլամական ջիհադի» 10 ակտիվիստների, այդ թվում` բջջի ղեկավար Իբրահիմ Էյդարուզին եւ կազմակերպության ռազմական գործողությունների բաժնի ղեկավար Ահմեդ Մաբրուքին:

Կասկած չի հարուցում այն փաստը, որ Ալ-Զավախիրին մասնակցել էր նաեւ Ղարաբաղում ադրբեջանական կողմից կռվող արաբների հավաքագրման աշխատանքներին, քանի որ «Ալ Քաիդայի» ղեկավարները Հայաստանը եւ Ղարաբաղը ներառել էին հզոր խալիֆաթի քարտեզի մեջ, որի ստեղծումը բեն Լադենի եւ Ալ-Զավախիրի վերջնական նպատակն է: Ղարաբաղյան զորքը գերի էր վերցրել Աֆղանստանից, Սուդանից եւ Եգիպտոսից տասնյակ արաբների, որոնք Ադրբեջան էին տեղափոխվում ահաբեկիչների բացած ճանապարհով: «Իսլամական ջիհադի» հիմնադիրն Ադրբեջանն օգտագործում էր որպես մեկնարկային կետ Չեչնիա գրոհայիններ ուղարկելու համար: Ինքը` Ալ-Զավախիրին նույնպես մեկ անգամ չէ, որ Բաքվով անցել է Գրոզնի` ճանապարհին հասցնելով հրահանգներ տալ ադրբեջանցի իր համախոհներին: Հայտնի է, որ «ահաբեկիչ համար երկուսը» Ադրբեջանում եղել է 1996թ.-ին: «Ուոլ Սթրիթ Ջըրնըլ»-ի տվյալներով, այդտեղից նա պատրաստվում էր մեկնել Դաղըստան, որպեսզի այնուհետեւ մեկնի Չեչնիա: Սակայն ճանապարհին նրան ձերբակալում են: Ռուս սահմանապահները չեն ճանաչում «Ալ Քաիդայի» գաղափարախոսին, քանի որ նրա փաստաթղթերը կեղծ էին: Այման Ալ-Զավախիրի հանդեպ հարուցվում է մեղադրանք սահմանն անօրինակ անցնելու կապակցությամբ, եւ նա բանտարկվում է կես տարի ժամանակով: Եվ միայն նրա ազատումից հետո Ռուսաստանի ազգային անվտանգության ծառայությունում հասկանում են, որ նրանց ձեռքում էր այն մարդը, որի գլուխն արժի 25 միլիոն դոլար:

Հիմքեր կան ենթադրելու, որ Ալ-Զավախիրին «Ալ Քաիդայի» ղեկավարներից միակը չէր, որ հնարավորություն էր ունեցել համոզվելու ադրբեջանցիների հյուրասիրության մեջ: Հիշեցնենք, որ ինչպես գրում էր բրիտանական «Դեյըլի Թելեգրաֆ» թերթը, 2001թ.-ին ձերբակալված Ուսամա բեն Լադենի անձնական խոհարար Մոհամմադ Աքրամի ցուցմունքներից երեւում էր, որ «համար մեկ ահաբեկչին» պետք է փնտրել Չեչնիայում, ուր նա կարող էր հայտնված լինել Ադրբեջանի տարածքից: