Նորարարության տոն. Երևանում մեկնարկել է Digitec Expo 11-րդ տեխնոլոգիական ցուցահանդեսը

PanARMENIAN.Net - Ավելի ու ավելի բարձր

Ոչ ոքի համար գաղտնիք չէ, որ վերջին տարիների տեխնոլոգիական նորարարությունների թվում կենտրոնական տեղերից մեկը զբաղեցնում են անօդաչու թռչող սարքերը` դրոնները: Չինական DJI ընկերությունը սիրողական դրոնների արտադրության համաշխարհային առաջատար է, որի միակ պաշտոնական ներկայացուցիչը Հայաստանում ոչ միայն զբաղվում է այդ բարդագույն սարքերի վաճառքով, այլ նաև ինքն է հավաքում որոշ դրոններ:

«Ամեն ինչ դեռ առջևում է. Հայաստանում դրոնների լայն արտադրությունը միայն ժամանակի հարց է»,-PanARMENIAN.Net ի հետ զրույցում հայտարարել է ArmComputers ընկերության ներկայացուցիչ Արմեն Սաֆարյանը: Ըստ նրա, թեև Հայաստանում չկա հստակ օրենսդրական դաշտ անօդաչու սարքերի օգտագործման կանոնակարգման համար, ինչը ևս ժամանակի հարց է, դրոններն կարելի է օգտագործել միայն մանրամասն կերպով ծանոթանալով շահագործման անվտանգության կանոններին յուրաքանչյուր թռիչքի ժամանակ:

Ցուցահանդեսում ներկայացված են նաև այլ ուղղվածության դրոններ` Սամարայում գործող «Ուրարտու-Սիսթեմս» ընկերության պրոֆեսիոնալ անօդաչու սարքերը: Ընկերության ինժեներ և աշխատակից Դավիթ Հովակիմյանը պատմեց, որ ընկերությունը երկար ժամանակ զբաղվել է փորձարկումների ավտոմատացմամբ և միայն վերջին 4 տարին է, ինչ մշակում է և ներկայացնում է անօդաչու թռչող սարքեր տարբեր ոլորտների և քաղաքացիական կիրառման համար:

«Այս պահի դրությամբ մենք 4 տեսակի դրոն ունենք, տարբեր չափերի ու նշանակության: Քանի որ մենք առաջին անգամ ենք մասնակցում ցուցահանդեսին, հուսով ենք, որ մեզ կնկատեն և նոր պայմանագրեր կլինեն, որոնք կենթադրեն նաև սարքերի արտադրություն Հայաստանում»,-ասել է նա:

Ռոբոտատեխնիկան շատ բարդ ու բուռն զարգացող ոլորտ է: Հատկապես դա վերաբերում է նորարար տեխնոլոգիաների կիրառմանը խոշոր արտադրություններում: Սակայն ոչ մեծ Rafa Solution հայկական ընկերությանը ոչ միայն հաջողվել է բավականին լավ դիրք զբաղեցնել հաստոցաշինության նորարարությունների ոլորտում, այլ նաև արտերկրում գործընկերներ գտնել ու սպառման շուկաներ:

Ռաֆայել Ղասաբյանը 2012-ին բացված ընկերության հիմնադիրներից է: Այսօրվա դրությամբ Rafa Solution-ն առաջարկում է գործակցության 3 ուղղություն` հաստոցների մշակում և ավտոմատացում, հատուկ ուսումնական ստենդերի մշակում նույն ոլորտի համար և տարբեր ծրագրերի ստեղծում վիետնամական մի ինստիտուտի համար, որը սովորեցնում է ուսանողներին հոսքային ավտոմատացում կառավարվող ռոբոտատեխնիկական մանիպուլյատորների միջոցով:

Մեր կյանքը խաղ է

Triada-ն բավականին երկար ճանապարահ է անցել և հետաքրքիր պատմություն ունի: Այն սկսվեց 1993-ին, երբ դեռ քչերն էին լսել եռաչափ համակարգչային գրաֆիկայի մասին, իսկ այդ ոլորտի մասնագետներին Հայաստանում կարելի էր մեկ ձեռքի մատների վրա հաշվել: Գործակցելով հիմնականում հեռուստաընկերությունների հետ, ստուդիան շատ արագ հեղինակություն ձեռք բերեց որպես որակյալ գովազդային հոլովակներ ստեղծող և տարեցտարի ավելի մեծ ճանաչում ստացավ: Այսօր ընկերությունը Հայաստանի համակարգչային գրաֆիկայի շուկայի անփոփոխ առաջատարն է:

Digitec Expo-ում ՀՀ ՏՏ ոլորտի վետերանը ներկայացրել է ոչ միայն իր նվաճումները համակարգչային գրաֆիկայի ոլորտում, այլ նաև արդեն մեծ ճանաչում ստացած Shadowmatic գլուխկոտրուկ խաղը: Այցելուները հնարավորություն ունեն իրենց սմարթֆոնների օգնությամբ խաղալ մեծ էկրանին: Եվ այդ շնորհանդեսը պատահական չէ` խաղը բացառիկ կդառնա Apple TV-ի նոր հեռուստատեսային կցորդի համար: Այդ մասին հայտարարվեց ընկերության շնորհանդեսում սեպտեմբերի 9-ին Սան Ֆրանցիսկոյում:

Հայկական Triada Studio Games ստուդիայի մանրակրկիտ և վիրտուոզ եռամյա աշխատանքի արդյունքն արդեն հասցրել է բազմաթիվ, այդ թվում նաև միջազգային հեղինակավոր մրցանակների արժանանալ խաղերի ինդուստրիայում: Իսկ այսօր արդեն խաղն արժանացել է տեղեկատվական տեխնոլոգիաների ոլորտի առաջատարի ամենաբարձր դրվատանքին` Shadowmatic-ը դարձել է Apple Design Awards-ի մրցանակակիրը:

Apple Design Awards (ADA)-ը հատուկ միջոցառում է, որը կորպորացիան անցկացնում է խաղային հավելվածներ մշակողների համար՝ WWDC ամենամյա համաշխարհային կոնֆերանսի շրջանակում: Մրցույթն ի հայտ է բերում iOS и Mac OS X օպերացիոն միջավայրերի համար նախատեսված անկախ հեղինակների ստեղծած ամենատաղանդավոր, նորարարական և լավագույն ծրագրային և ապարատային մշակումները: Պարգևները հանձնվում են տարբեր անվանակարգերում, որոնք ամեն տարի փոխվում են: 2003-ից ի վեր խորանարդի տեսքով մրցանակները հանձնվում են յուրաքանչյուր նոմինանտի: Խորանարդի մի կողմում Apple-ի լոգոտիպն է, որը լուսավորվում է դրան դիպչելիս:

«Սարքը վաճառքում կհայտնվի հավանաբար հոկտեմբերի կեսին: Shadowmatic-ը կլինի այն 10 խաղերից մեկը, որոնք բացառիկ կլինեն Apple TV-ի համար»,- ասել է Triada-ի տեխնիկական տնօրեն Բագրատ Դաբաղյանը: Մեկ շաբաթ շարունակ խաղի բջջային տարբերակը հնարավոր էր ներբեռնել անվճար: Այն, որ խաղը սիրվել է, վկայում են թվերը` 2 մլն ավելի ներբեռնում: Զգալիորեն ընդլայնվել է նաև ներբեռնումների աշխարհագրությունը:

Հայկական «խաղաստանի» մյուս ներկայացուցիչները կենտրոնացած են վիրտուալ իրականության տեխնոլոգիաների վրա: Այդպես, ARLOOPA ընկերությունը: «Անտարես» հրատարակչության հետ համատեղ Երևանում կայանալիք ամենամյա Digitec Expo ցուցահանդեսում կներկայացնի վիրտուալ իրականության ARLOOPA cardboard ակնոցը:

Վիրտուալ իրականության ակնոցը թույլ է տալիս մասնակիորեն ընկղմվել վիրտուալ իրականության աշխարհի մեջ` ստեղծելով ներկայության դիտողական և ակուստիկ էֆեկտ տվյալ համակարգչային տարածքում: Ընդ որում շրջակա միջավայրը գործնականում չի ընկալվում:

Առաջնայինը առողջությունն է

Ցուցահանդեսում ներկայացված է հայկական ընկերությունների ամենատարբեր սոֆթ` հատուկ տեղ են զբաղեցնում բջջային հավելվածները: Օրինակ, Eye Care Plus-ը թույլ է տալիս սմարթֆոնի և Android-ի հենքով պլանշետի միջոցով ստուգել տեսողությունը: Արամ Մխիթարյանը, որը հարթակի հեղինակներից մեկն է, պատմել է, որ օգտատերը տարբեր թեստեր է անցնում պատկերների հիման վրա, պատասխանելով հարցերին, որից հետո ծրագրի ալգորիթմը հաշվարկում է նրա տեսողությունը:

«Հավելվածն օգնում է հատուկ վարժություններ կատարել` աչքերի համար մարզանք, կարևոր տեղեկություններ է տրամադրում, ինչպես նաև օգնում է օգտատերին կապ հաստատել բժիշկների հետ, որոնք կպատասխանեն նրա հարցերին և մասնագիտական խորհուրդներ կտան»,-ասել է նա:

Այս պահի դրությամբ Eye Care Plus-ը կարելի է ավճար ներբեռնել, սակայն հետագայում կարող են հայտնվել նաև լրացուցիչ վճարովի գործառույթներ:

Teamable-ն ամենահաջողված հայկական ստարտափերից է, որն արդեն իր տեղն ունի և շարունակում է արագ զարգանալ, գործակցելով խոշորագույն համաշխարհային ընկերությունների հետ: Իսկ հաջողության գաղտնիքը շատ պարզ է` թիմին հաջողվել է ստեղծել իր տեսակի մեջ եզակի և շատ օգտակար պրոդուկտ, որի մասին պատմել է ընկերության համահիմնադիր Վազգեն Հակոբջանյանը:

«Teamable-ի ծրագրային ապահովումն օգնում է ընկերություններին բարձր որակավորում ունեցող աշխատակիցների թիմ հավաքել և կառավարել արդեն առկա ռեսուրսները: Լուծումներից առաջինը ներքին ցանցն է, որտեղ ընկերության յուրաքանչյուր աշխատակից իր անձնական էջն ունի: Այստեղ նա նշում է իր հմտությունները, գիտելիքները, մշտապես նորացնում է նախագծերի ցանկը, որոնց իրականացմանը մասնակցել է: Ընկերության մենեջերը որոնողական համակարգի օգնությամբ նոր թիմ է հավաքում ներսի աշխատակիցներից նոր նախագծի համար և նրան հարկավոր են որոշ մասնագետներ կոնկրետ ոլորտներից, որոնց նա գտնում է որոնողական համակարգի շնորհիվ»,-ասել է Հակոբջանյանը:

Երկրորդ լուծումը թույլ է տալիս օգտագործել աշխատակիցների կոնտակտները նոր աշխատակիցներ որոնելու համար: Օգտատերի թույլտվությամբ, համակարգը սկանավորում է ընկերության աշխատակիցների կոնտակտները սոցցանցերում, և թափուր աշխատատեղի առկայության դեպքում, տարածում է տեղեկությունը կոնտակտների շրջանում: