Մինչև 2010 թվականի աշունը բջջային օպերացիոն համակարգերը կտեղայնացվեն Հայաստանի համար

PanARMENIAN.Net - Ամերիկայի հայկական համագումարը թողարկել է iPhone հեռախոսների համար նախատեսվածiAssembly հավելվածը, ինչը հնարավորություն կտա օգտվողներին ծանոթանալ Ամերիկայի և այլ երկրների հայ համայնքների նորություններին: Assembly հավելվածը նախատեսված է այն ակտիվիստների համար, որոնք ցանկանում են կապի մեջ լինել Կոնգրեսի անդամների հետ: Հավելվածի օգնությամբ օգտվողները կկարողանան կապվել ԱՄՆ կառավարության ներկայացուցիչների հետ Հայոց ցեղասպանության մասին բանաձևի, ԼՂՀ-ին ֆինանսական աջակցության և Հայաստանին և հայերին վերաբերող կարևոր օրենսդրական նախաձեռնությունների հարցերով` ներմուծելով փոստային ինդեքսը: Օգտվողները նաև կկարողանան ծանուցում ստանալ կազմակերպության նոր մամլո հաղորդագրությունների մասին, ինչպես նաև ցանկության դեպքում նվիրատվություն անել ԱՀՀ-ին: iAssembly հավելվածը, որը համատեղելի է iPhone, iPod touch, iPad սարքերի հետ, կարելի է անճվար ներբեռնել iTunes-ից:

Մատուցած ծառայությունների դիմաց «Արմենտել» ընկերության ստացած շահույթը 2010 թ. առաջին եռամսյակում կազմել է 16 մլրդ դրամ, ինչը 6,2 տոկոսով պակաս է 2009 թ. նույն ժամանակաշրջանի համեմատ (17 մլրդ դրամ): PanARMENIAN.Net ի թղթակցին «Արմենտել» ընկերությունը հայտնում է, որ 2010 թ. առաջին եռամսյակում բջջային կապը ընկերությանը 5,6 մլրդ դրամ շահույթ է բերել, իսկ ֆիքսված կապը` 10,2 մլրդ դրամ: Ընդ որում, բջջային կապից ստացված շահույթը 16%-ով նվազել է համեմատած անցյալ տարվա առաջին եռամսյակի հետ, և միայն 0,5%-ով նվազել է ֆիքսված հեռախոսակապի մատուցած ծառայություններից ստացված եկամուտը: «Շահույթի նվազումը մեծ մասամբ պայմանավորված էր ակտիվ բաժանորդագրային պայմանագրերի թվի նվազմամբ, որը բխում է շուկայի հետագա շարժմամբ «զրո ցանցի ներսում» մոդելի կողմը, որն ուղղված է ցածր եկամուտով հաճախորդներին, որոնք զգայուն են գնի փոփոխությունների հանդեպ»,- նշվում է զեկույցում:

Միևնույն ժամանակ 28,9 տոկոսով ավելացել է բջջային կապի օգտագործվող րոպեների քանակը` 2009 թ. առաջին եռամսյակի համեմատ, ինչպես նաև 14 տոկոսով ավելացել է բջջային կապի բաժանորդների հետ կնքած պայմանագրերը: Լայնագիծ հասանելիության բաժանորդների հետ պայմանագրերի քանակն ավելացել է 103,9 տոկոսով` 2009 թ. առաջին եռամսյակի համեմատ, ինչը բացատրվում է ինտերնետային լայնագիծ հասանելիության ոլորտում ընկերության նախագծերի ակտիվ զարգացմամբ: «Վիմպելկոմ» ընկերության հաշվետվության մեջ նշվում է, որ Հայաստանում և Ուզբեկստանում իրավիճակը դեռևս բարդ է, թեև ընկերությունը գոհ է այն բանից, թե ինչպես է զարգանում բիզնեսը Ղազախստանում և Վրաստանում:

ԱՊՀ երկրները հետաքրքրված են իննովացիաների ոլորտում համագործակցությամբ: Երևանում ԱՊՀ մասնակից պետությունների իննովացիոն համագործակցության Միջպետական նպատակային ծրագրի նախագծի մշակման գծով աշխատանքային խմբի նիստին մասնակցում էին Հայաստանի, Ռուսաստանի, Թաջիկստանի, Ուզբեկստանի, Թուրքմենստանի, Ուկրաինայի, Բելառուսիայի և Մոլդովայի ներկայացուցիչները: ԱՊՀ գործերով Դաշնային գործակալության ղեկավարի տեղակալ Իգոր Մորոզովի խոսքով, համագործակցությունն առաջին հերթին վերաբերում է այնպիսի ոլորտներին, ինչպիսիք են ինքնաթիռների և նավաշինությունը, էներգետիկան ու էներգախնայությունը և այլն: 2010 թվականի դեկտեմբերին աշխատանքային խմբի գործունեության արդյունքները կներկայացվեն ԱՊՀ երկրների նախագահներին: Իսկ 2011 թվականի հունվարից մինչև 2020 թվականը ծրագրված է նախագծերի իրականացումը:

Հայաստանի կառավարությունը մայիսի 27-ի նիստում հաստատել է Գյումրու տեխնոպարկի գործունեության իրականացման 2010 թվականի ծրագիրը: Ինչպես հաղորդել է ՀՀ էկոնոմիկայի փոխնախարար Արա Պետրոսյանը, ծրագիրը ներառում է երեք հիմնական բաղադրիչ`տեխնոպարկի գործունեության կառավարում Գյումրու տնտեսական զարգացման հիմնադրամի կողմից, մեխանիկայի և էլեկտրոնիկայի ոլորտների ուսումնական և գիտահետազոտական լաբորատորիաների հիմնում՝ տեղական և միջազգային ճանաչում ունեցող ընկերությունների հետ, ինչպես նաև որարարությունների ու ժամանակակից տեխնոլոգիաների ներդրման աջակցությանն ուղղված ծրագրերի իրագործում։ Բացի այդ, ծրագրով նախատեսվում է նաև տեխնոպարկի տարածքում ազատ առևտրի գոտու ստեղծման բիզնես մոդելի մշակում: Նախնական հաշվարկներով որպես ծրագրի իրականացման կողմնորոշիչ չափաքանակ է սահմանվել 200 մլն դրամը: Գյումրու Տեխնոպարկի գործունեության իրականացման 2010 թվականի ծրագիրը կֆինանսավորվի Հայաստանի Հանրապետության պետական բյուջեից և ՀՀ օրենսդրությամբ չարգելված այլ միջոցների հաշվին։

Հայկական պատվիրակությունն Ամստերդամում մասնակցում է Տեղեկատվական տեխնոլոգիաների ու ծառայությունների համաշխարհային կոնգրեսին: Կոնգրեսին, որն անցավ մայիսի 25-27-ը, մասնակցում են նաև «Նորք» տեղեկատվական-վերլուծական կենտրոնը, «Essential Solution» ընկերությունը; պատվիրակությունը գլխավորում է ՏՏ ոլորտի ձեռնարկությունների միությունը: Առաջին կոնգրեսը տեղի ունեցավ 1978 թվականին Բարսելոնայում` այդ օրվանից դառնալով այդ ոլորտում ամենակարևոր միջազգային ֆորումներից մեկը, որին մասնակցում են բիզնեսի, գիտության և իշխանության առաջատար ներկայացուցիչները: Հայաստանը մասնակցում է կոնգրեսին արդեն չորրորդ անգամ: