Ֆուտբոլի Հայաստանի հավաքականը 2011-ը սկսեց պարտությամբ

PanARMENIAN.Net - Հայաստանի հավաքականի կազմում հանդիպումը բաց թողեց պաշտպան Ռոբերտ Արզումանյանը, որը մարզումների ժամանակ վնասվածք է ստացել, պաշտպանության կենտրոնում խաղացին Արարատ Առաքելյանն ու Հրայր Մկոյանը: Հանդիպումը բաց թողեց նաև հարձակվող Յուրա Մովսիսյանը:

Խաղի սկզբում թիմերը փոխանակվեցին մի քանի հարվածներով, սակայն աստիճանաբար Վրաստանի հավաքականն իր ձեռքը վերցրեց խաղը` հայ ֆուտբոլիստներին հարկադրելով սխալներ թույլ տալ: 22-րդ րոպեին ալեքսանդր Իաշվիլիի շնորհիվ Վրաստանի հավաքականն առավելություն ստացավ, իսկ 12 րոպե հաշիվը կրկնապատկեց Դավիթ Սիրաձեն:

Երկրորդ խաղակեսում հայ ֆուտբոլիստները փորձեցին ավելի շատ հարձակվել և որոշակի առավելության հասան: Հեռակա հարվածներով աչքի ընկան Էդգար Մալաքյանն ու Մարկոս Պիզելլին, սակայն հաշիվը կրճատել հաջողվեց միայն 67-րդ րոպեին: Հենրիկ Մխիթարյանը պենալտի վաստակեց, որը հաջողությամբ իրացրեց Էդգար Մանուչարյանը: Այս գոլը վստահություն հաղորդեց հայ ֆուտբոլիստների գործողություններին, սակայն նրանց այդպես էլ չհաջողվեց հավասարեցնել հաշիվը: Հանդիպումն ավարտվեց Վրաստանի հաղթանակով` 1:2:

Սա Հայաստանի ու Վրաստանի հավաքականների 5-րդ հանդիպումն էր, և առայժմ առաջատար են վրացիները, նրանք իրենց հաշվում ունեն երեք հաղթանակ, մեկ ոչ ոքի և մեկ պարտություն:

Փետրվարի 9-ին Աբու Դաբիի «Heikh Zayed» մարզադաշտում Ռուսաստանի ֆուտբոլի ազգային հավաքականն անցկացրեց 2011թ. իր առաջին հանդիպումը: Ընկերական հանդիպմանը Դիկ Ադվոկատի սաները մրցեցին Իրանի հավաքականի հետ, որտեղ հանդես է գալիս հայազգի ֆուտբոլիստ Անդրանիկ Թեյմուրյանը:

Ռուսաստանի հավաքականը գնդակ ընդունեց իր դարպասը խաղի ավարտին. 89-րդ րոպեին խաղի միակ գոլն իրացրեց և իր թիմին հաղթանակ բերեց Մոհամմադ Հալաթբարին:

«Մենք վատ խաղացինք: Նման ֆուտբոլով ոչ թե Եվրոպայի առաջնությունում, այլ նույնիսկ Հայաստանում ակնկալիքներ չպետք է ունենանք: Երևանում մենք պետք է բոլորովին այլ խաղ ցույց տանք: Ըստ իս, այսօր դա հասկացավ մեզանից յուրաքանչյուրը»,-Իրանի հավաքականին պարտվելուց հետո ասել է Ռուսաստանի հավաքականի ավագ Անդրեյ Արշավինը:

Իսկ sport-express.ru-ի այն դիտողությանը, որ Հայաստանը ևս զիջեղ վրացիներին 1:2 հաշվով, կիսապաշտպանն ասել է. «Հասկանում եմ, որ նման խաղից հետո դա այնքան էլ տեղին չի հնչի, սակայն, Ռուսաստանի հավաքականը Հայաստանից չէ, որ պետք է օրինակ վերցնի: Բնականաբար, Երևանում կայանալիք խաղը բարդ է լինելու, բոլորը դա հասկանում են, սակայն, եթե մենք վերադարձնենք մեր խաղը, իսկ մենք դա պարտավոր ենք անել, ամեն ինչ մեր ձեռքերում կլինի»:

Ըստ պաշտպան Ռոման Շիշկինի, «հանդերձարանում Ադվոկատը մի երկու խոսքով հայտնեց իր տպավորությունը խաղից: Եվ վերջ, ոչ մի կոնկրետ դիտողություն: Աստված տա, որ Բելգիայից ու Իրանից կրած պարտությունները մեզ համար դաս լինեն և մենք լավ մարզավիճակում լինենք Հայաստանի հետ խաղից առաջ»,-ասել է Շիշկինը:

B խմբում Հայաստանի մրցակիցներից հաղթանակ է տարել միայն Իռլանդիայի հավաքականը. Ջովանի Տրապատոնիի սաները 3 անպատասխան գնդակ ուղարկեցին հակառակորդի դարպասը: Սլովակիայի հավաքականը հյուրընկալվեց «Ժոզի Բարտել» մարզադաշտում, որտեղ հանդիպեց Լյուքսեմբուրգի հավաքականի հետ և զիջեց 1:2 հաշվով: Մակեդոնիայի հավաքականը նվազագույն հաշվով զիջեց Կամերունի հավաքականին:

Հիշեցնենք, որ B խմբում բարդ իրավիճակ է ստեղծվել, խմբի առաջատարը` Ռուսաստանի հավաքականն ունի 9 միավոր, Հայաստանի, Սլովակիայի և Իռլանդիայի հավաքականները` 7-ական միավոր:

Հայաստանի ֆուտբոլի երիտասարդական հավաքականը ԵԱ - 2011-2013 նախընտրական շրջանի խմբային փուլում C խմբում կխաղա Չեխիայի, Ուելսի, Չեռնոգորիայի և Անդորրայի հետ:

Վիճակահանության համաձայն, առաջին հանդիպումը հայ ֆուտբոլիստները կանցկացնեն Չեռնոգորիայի հավաքականի հետ հունիսի 7-ին Երևանում: Այնուհետև սեպտեմբերի 3-ին կհյուրընկալվեն Անդորրայում:

2011 թվականին Հայաստանի հավաքականը կանցկացնի ևս երեք հանդիպում. Սեպտեմբերի 6-ին Չեխիայի հետ, նոյեմբերի 11-ին Երևանում կկայանա պատասխան հանդիպում, իսկ նոյեմբերի 15-ին` Ուելսի հետ:

2012 թվականի հունիսի 12-ին Հայաստանում կկայանա Հայաստան-Անդորրա հանդիպումը, օգոստոսի 15-ին` Ուելս-Հայաստան և սեպտեմբերի 10-ին` Չեռնոգորիա-Հայաստան հանդիպումները, PanARMENIAN.Net ին հաղորդել են Հայաստանի Ֆուտբոլի ֆեդերացիայի մամլո ծառայությունից:

Ըմբշամարտ. Փետրվարի 2-ից, հունահռոմեական ոճի ըմբշամարտի Հայաստանի առաջնության ավարտից հետո, Հայաստանի հավաքականը ուսումնամարզական հավաք է անցկացնում Երևանում: Ըմբիշները նախապատրաստվում են Աշխարհի գավաթի և Գրան-պրիի մրցաշարերին:

Հայաստանի հավաքականի գլխավոր մարզիչ, Օլիմպիական չեմպիոն Լևոն Ջուլֆալակյանը PanARMENIAN.Net ի թղթակցի հետ զրույցում հայտնել է, որ Աշխարհի գավաթի մրցաշարին կմասնակցեն երկրի առաջնությունում մրցանակային տեղեր զբաղեցրած ըմբիշները, իսկ ինքը կգլխավորի պատվիրակությունը: «Փետրվարի 17-20-ը Մինսկում Աշխարհի գավաթի մրցաշարում յուրաքանչյուր քաշային կարգում ես 2-ական մարզիկի եմ հայտագրել՝ Արմեն Չոմարյանին և Նարեկ Խաչատրյանին (55 կգ ք/կ), Արթուր Մկրտչյանին ու Արտակ Հարությունյանին (60 կգ ք/կ), Հովհաննես Վարդերեսյանին ու Արամ Ջուլֆալակյանին (66 կգ ք/կ) և Տիգրան Սահակյանին ու Հրայր Հովհաննիսյանին (84 կգ ք/կ)»,-ասել է հավաքականի մարզիչը:

Մինչև 74կգ քաշային կարգում հանդես կգա Վարշամ Բորանյանը, մինչև 96կգ կարգում՝ Սարգիս Տոնոյանն ու մինչև 120կգ քաշային կարգում՝ Վաչիկ Եղիազարյանը:

Գրան-պրիին, որը նույն ժամանակշրջանում կանցնի Սլովենիայում, Արամ Մարգարյանի գլխավորությամբ կմասնակցեն աշխարհի առաջնության բրոնզե մրցանակակիր, Եվրոպայի չեմպիոն և Օլիմպիական խաղերի բրոնզե մեդալակիր Ռոման Ամոյանը (55 կգ ք/կ), Վահան Ջուղարյանը (60 կգ ք/կ), Եվրոպայի չեմպիոն ու աշխարհի առաջնության արծաթե մրցանակակիր Արսեն Ջուլֆալակյանը (74 կգ ք/կ) և Արթուր Շահինյանը (84 կգ ք/կ):

Բռնցքամարտ. Արթուր Աբրահամի մարզիչ Ուլի Վեգները պատմել է, որ իր սանը հիանալի պատրաստվում է մենամարտին, որը տեղի է ունենալու փետրվարի 12-ին Գերմանիայում: Աբրահամի մրցակիցը լինելու է Ստեփան Բոժիչը (Խորվաթիա):

«Արթուրն իր կարիերայի անցումային փուլում է, բայց բացարձակ ուժ չի խնայում մարզումների ժամանակ: Նա պետք է ոչ միայն հաղթի, այլ պետք է դա անի իր ոճով: Ես համոզված եմ, որ նա չի հիասթափեցնի իր երկրպագուներին»,- Վեգների խոսքերը հաղորդում է allboxing.ru-ն:

Դա միջանկյալ հանդիպում է «Super Six» մրցաշարի կիսաեզրափակիչ հանդիպումից առաջ, որում Աբրահամը հանդիպելու է Անդրե Ուորդի հետ (ԱՄՆ): Մենամարտը, հավանաբար, տեղի է ունենալու մայիսին:

Լոս Անջելեսում կայացել է թեթևագույն քաշային կարգի մրցաշարի մասնակիցների մամլո ասուլիսը: Մրցաշարին մասնակցում է նաև Վիկ Դարչինյանը: Եզրափակիչ մարտերը տեղի են ունենալու ապրիլի 24-ին Լոս Անջելեսում Nokia Theatre-ում:

Դարչինյանը, որը հանդիպելու է Յոնի Պերեսի հետ (Կոլումբիա), ասել է, որ իսկական բռնցքամարտիկը փորձելու է իր ողջ ուժը ցույց տալ այդ մարտում: «Ես հաղթանակ կտանեմ նոկաուտով և ցույց կտամ, որ ավելի ուժեղ եմ: Անհամբերությամբ սպասում եմ այդ պայքարին և ֆավորիտ եմ համարվում»,- հայ բռնցքամարտիկի խոսքերը հաղորդում է fightnews.com-ը:

Մեկ այլ զույգում հանդիպելու են Աբներ Մարեսը (Մեքսիկա) և Ջոզեֆ Ագբեկոն (Գանա): Ագբեկոն Դարչինյան-Պերես մենամարտը համարում է մեծ գոտեմարտ:

Ձյուդո. Փարիզում ավարտվել է ձյուդոյի Մեծ սաղավարտի խաղարկությունը: 2009-ի աշխարհի բրոնզե մեդալակիր Հովհաննես Դավթյանը (60 ք/կ) և 2010-ի աշխարհի գավաթակիր Արմեն Նազարյանը (66 ք/կ) նվաճել են արծաթե մեդալներ: Բոլոր մենամարտերում նրանք տարել են վստահ հաղթանակներ` պարտվելով միայն եզրափակչում:

Եզրափակչում Դավթյանը և Նազարյանը պարտվել են համապատասխանաբար Ռիշոդ Սոբիրովին (Ուզբեկստան) և Ջունպեյ Մորիշիտեին (Ճապոնիա):

Փետրվարի 12-13-ը ձյուդոյի Հայաստանի հավաքականը Բուդապեշտում հանդես է գալու Աշխարհի գավաթի խաղարկությունում, փետրվարի 19-20-ը` Դյուսելդորֆի Գրան պրիում, փետրվարի 26-27-ը` Վարշավայում` Աշխարհի գավաթի հաջորդ փուլում: