6 կուսակցություններ ստորագրել են մայիսի 6-ին տեղամասերում նկարահանումներ կատարելու մասին փաստաթուղթ

3 մայիսի 2012 - 16:31 AMT

PanARMENIAN.Net - Մայիսի 6-ին կայանալիք խորհրդարանական ընտրություններին մասնակցող 6 կուսակցությունները հանդես են եկել համատեղ հայտարարությամբ. «Մենք` «Բարգավաճ Հայաստան», Հայ հեղափոխական դաշնակցություն, Հայաստանի դեմոկրատական, Հայաստանի կոմունիստական, Հայաստանի հանրապետական, «Օրինաց Երկիր» կուսակցությունների ներկայացուցիչներս, կարևորելով 2012 Ազգային ժողովի ընտրությունների անցկացման որակը ու պատշաճ վերահսկողություն իրականացնելու անհրաժեշտությունը և հիմք ընդունելով ՀՀ ընտրական օրենսգրքի 6-րդ, 48-րդ և 67-րդ հոդվածների դրույթները, որոշեցինք դրսևորել միասնական կամք, միավորել մեր հնարավորությունները, և համատեղ ջանքերով ՀՀ հնարավորինս մեծաքանակ ընտրական տեղամասերում իրականացնել քվեարկության գործընթացի և արդյունքների ամփոփման տեսանկարահանում` չխախտելով քվեարկության գաղտնիությունը: Յուրաքանչյուր մասնակից կուսակցության վստահված անձի կատարած տեսանկարահանումը ըստ պահանջի կտրամադրվի մյուս մասնակից կուսակցությանը: Սույն հայտարարությանը կարող են միանալ Ազգային Ժողովի ընտրություններին համամասնական կարգով մասնակցող մյուս կուսակցությունները»: «Մավորված հայեր», «Ժառանգություն» կուսակցություններն ու ՀԱԿ-ը չեն միացել հայտարարությանը: