ԱԺ նախագահին կից մոնիթորինգային խմբի գործունեությունը դրական է գնահատվել

PanARMENIAN.Net - Մայիսի 11-ին տեղի ունեցված ՀՀ ԱԺ նախագահին կից մոնիթորինգային խմբի նիստի ընթացքում, որին մասնակցել են նաև քաղաքական ուժերի, հասարակական և միջազգային կազմակերպությունների ներկայացուցիչներ, ԱԺ նախագահ Սամվել Նիկոյանը ներկայացրել է քայլերը, որոնք կատարվել են նախորդ նիստում բարձրացված հարցերին լուծում տալու ուղղությամբ:

Մասնավորապես նշվել են այն միջոցառումները, որոնք ձեռնարկվել են ընտրողների անձնագրերի վրա դրվող դրոշմակնիքների` սահմանված ժամկետից շուտ անհետացող թանաքների օգտագործման, ինչպես նաև ուսումնական հաստատություններում քարոզչական բնույթի միջոցառումներ կազմակերպման հարցերի վերաբերյալ: Ներկայացվել են խմբի գործունեության շրջանակներում իրականացված մյուս աշխատանքները, որոնք թե տեղի, թե արտասահմանցի մասնակիցների կողմից դրական գնահատական են ստացել: Առաջարկվել է հետագայում ևս կազմակերպել այս ձևաչափով աշխատանքներ:

Նիկոյանն ընդգծել է, որ աշխատանքային խմբի կարևոր առաքելություններից մեկն ընտրական օրենսգրքի նոր դրույթների կիրարռման մոնիթորինգն էր, բացահայտելը, թե որքանով են դրանք կենսունակ բուն ընտրական գործընթացներում: Հնչել են տարբեր դիտարկումներ, որոշվել է եղած առաջարկները գրավոր հավաքագրել և համապատասխան կարգով ներկայացնել հինգերորդ գումարման Ազգային ժողովին:

ԱԺ նախագահը շնորհակալություն է հայտնել կողմերին շահագրգիռ մասնակցության և արդյունավետ համագործակցության համար: Նա կարևորել է նաև հասարակական կազմակերպությունների ակտիվ գործունեությունը` ընդգծելով հետագայում նրանց ներուժը խորհրդարանի աշխատանքներում ամենայնս օգտագործելու նպատակահարմարությունը:

Որոշվել է ԱԺ նախագահին կից մոնիթորինգային հանձնաժողովի կատարած աշխտանքների կապակցությամբ հանդես գալ միասնական հայտարարությամբ: