Կարինե Աճեմյան. ՀՀԿ-ն կոալիցիա կկազմի Սերժ Սարգսյանին սատարող ուժերի հետ

PanARMENIAN.Net - ՀՀԿ-ն կոալիցիա կկազմի Սերժ Սարգսյանին սատարող ուժերի հետ: Այսօր լրագրողների հետ հանդիպմանը նման կարծիք հայտնեց ՀՀԿ-ական պատգամավոր Կարինե Աճեմյանը՝ հավելելով, որ կոալիցիա կամ որևէ միավորում ինքնուրույն չի ձևավորվում. «Ամեն ինչ ստացվում է ընդհանուր գաղափարների, ծրագրերի շուրջ: Բայց կոալիցիան պետք է: Ինչքան Ազգային ժողովում քաղաքական ուժերը համախմբված լինեն, այնքան ավելի արդյունավետ կլինի աշխատանքը, սակայն կոալիցիայի ձևավորումը չպետք է ինքնանպատակ դառնա»:

Անդրադառնալով ՀՀԿ-ԲՀЛ կոալիցիայի կազմավորմանը՝ Աճեմյանն ասաց, որ ամեն ինչ պարզ կդառնա պաշտոնական հայտարարությունից հետո, որը շուտով կարվի:

Պատգամավորի կարծիքով, 5-րդ գումարման Ազգային ժողովի «ներկապնակը բազմազան է լինելու». «Այն քաղաքական ուժերը, որոնք նախկինում գործունեություն էին ծավալում նաև Ազգային ժողովից դուրս, այժմ կմտնեն խորհրդարան»:

Բանախոսը նշեց նաև, որ չնայած միջազգային դիտորդների և դիվանագետների կորպուսի ընտրություններին տված դրական գնահատականին, ավելի կարևոր է հասարակության գնահատականը: «ՀՀԿ-ն կփորձի շտկել այն թերությունները, որոնք գրանցվեցին այս ընտրությունների ընթացքում»,- ասաց նա:

Խոսելով վարչապետի հնարավոր թեկնածուների մասին՝ Աճեմյանը նշեց, որ ՀՀԿ-ն որոշում կկայացնի կուսակցության ներսում անցկացվող քվեարկության արդյունքում: