Երևանում աշխարհահռչակ բարիտոն Վլադիմիր Չեռնովը կերգի հայերեն

PanARMENIAN.Net - «Մետրոպոլիտան» օպերային թատրոնի մենակատար, բարիտոն Վլադիմիր Չեռնովը Հայաստանում կատարելու է հայ բանաստեղծների ստեղծագործությունների հիման վրա գրված երկը: Այդ մասին մամլո ասուլիսի ժամանակ ասաց ամերիկյան «Դիլիջան» փառատոնի գեղարվեստական ղեկավար, ջութակահար Մովսես Պողոսյանը: Փառատոնը հյուրընկալվել է «Երևանյան հեռանկարներ» փառատոնին: Համերգաշարը տեղի է ունենալու հունիսի 10-17-ը:

Չեռնովը կատարելու է ամերիկացի կոմպոզիտոր Յեն Քրաուզի «Նոկտյուրններ» կես ժամանոց ստեղծագործությունը, որը գրվել է Մեծարենցի, Տերյանի և Քուչակի բանաստեղծությունների հիման վրա: Այն առաջին անգամ կատարվել է «Դիլիջան» փառատոնի ժամանակ 2010թ-ին: Մովսես Պողոսյանի խոսքով, Չեռնովը երկու ամիս աշխատել է, որպեսզի լավ սովորի արտասանել հայերեն բառերը: Հուլիսին Չեռնովն այդ ստեղծագործությունը կատարելու է իտալական փառատոնի ժամանակ:

Համերգաշարի ընթացքում սպասվում է 5 համերգ կամերային երաժշտության տանը, 1-ը Արամ Խաչատրյան համերգասրահում, մեկ բացօթյա համերգ Կասկադում, ևս մեկը` Դիլիջանում:

Փառատոնը կհյուրընկալի թվով 20 անուն կատարողների` Լոս Անջելեսի ֆիլհարմոնիկ նվագախմբի գլխավոր կլարնետահար Միշել Շուկովսկիին, սոպրանո Թոնի Արնոլդին և այլ հայտնի երաժիշտների:

Համերգաշարում, բացի համաշխարհային դասականների ստեղծագործություններից, հնչելու են նաև վերջին մի քանի տարիներին հայ կոմպոզիտորների հատուկ Դիլիջանի համար գրված գործեր: