«Վորլդ Վիժնի» ամառային ճամբարներին այս տարի կմասնակցի 2 800 երեխա

PanARMENIAN.Net - Հուլիսի մեկից կգործեն «Վորլդ Վիժնի» ամառային ճամբարները, որին սպասում են 2 800 երեխաներ Հայաստանի հեռավոր համայնքներից: Այս մասին PanARMENIAN.Net ին հաղորդում են «Վորլդ Վիժն» կազմակերպությունից:

Հայաստանի վեց մարզերի կարիքավոր համայնքներից երեխաներ հնարավորություն կունենան իրենց ամառային հանգիստն ու ուրախ ժամանցը կազմակերպել մանկական ճամբարներում:

Այս տարի «Վորլդ Վիժնը» ավելացնում է ճամբար այցելող երեխաների թիվը՝ նախորդ 12 տարվա համեմատ: Այդ հարցում «Վորլդ Վիժնին» աջակցեց ՔՐՈՆԻՄԵՏ Բարեգործական հիմնադրամը, որ Վորլդ Վիժնին տրամադրեց 30 000 ԱՄՆ դոլար: Տրամադրված գումարը թույլ կտա ճամբարում հյուրընկալել ևս 325 երեխայի՝ 200-ը Սիսիանի, 125-ը Ալավերդիի տարածաշրջանից:

Արդեն տասներկու տարի է, ինչ բազմաթիվ զարգացման ծրագրերի հետ մեկտեղ «Վորլդ Վիժնը» կազմակերպում է ամառային ճամբարներ երեխաների համար. 20 000 երեխա Գյումրիից, Տավուշից, Ստեփանավանից, Ալավերդիից, Ապարանից, Վարդենիսից, Գավառից, Սիսիանից, Կապանից և Թալինից արդեն մասնակցել են ճամբարներին: