«Իրատես de facto». Լևոն Տեր-Պետրոսյանը նախագահական ընտրություններին չի առաջադրվի

7 սեպտեմբերի 2012 - 09:58 AMT

PanARMENIAN.Net - «Իրատես de facto»-ն գրում է, որ ՀԱԿ-ը կրկին այս օրերին քաղաքական դիրքորոշման հստակության օրեր է ապրում։ «Ընդդիմության միասնական թեկնածուի հավանականությունը կամաց-կամաց անհավանականի դաշտ է տեղափոխվում։ Մեր աղբյուրի փոխանցմամբ, ՀԱԿ-ում այսօր կրկին քննարկում են խիստ ընդդիմադիր դիրքերից հանսես գալու մասին, այսինքն՝ խզելու կապերը բոլոր նրանց հետ, ովքեր իշխանական «ստվեր» ունեն։ Այս առումով առաջին պլանում ԲՀԿ-ի հետ համագործակցությունն է, որը, ամենայն հավանականությամբ, կշարունակվի այս կերպ, ասել է չեզոք, կամ կավարտվի հրապարակային ապահարզանով։

Ի դեպ, Լևոն Տեր-Պետրոսյանն էլ առաջիկայում պիտի հայտարարի՝ 2013-ի նախագահական ընտրություններին մասնակցո՞ւմ է, թե՞ ոչ։

Մեր աղբյուրի տեղեկության համաձայն, նա չի առաջադրի իր թեկնածությունը նախ եւ առաջ այն պատճառով, որ այլևս ժողովրդի մեջ չկա այն ոգևորվածությունը, ինչ նախորդ ընտրության ժամանակ էր։ Իսկ ՀԱԿ առաջնորդը քաղաքական հաշվարկների հմուտ վարպետ է ու չի ցանկանա այս անգամ էլ հայտնվել անհարմար վիճակում։ Սակայն այս դեպքում էլ հարց է ծագում՝ ո՞վ, եթե ոչ նա»։