Սաֆարովի ներման դեմ մոսկովյան հանրահավաքում ամեն ինչ դեռ հանգիստ է

PanARMENIAN.Net - Մոսկվայի Կրասնոպրեսնենսկայա զաստավա հրապարակում Ռամիլ Սաֆարովի արտահանձնման ու ներման դեմ ընթացող մոսկվաբնակ հայերի հանրահավաքում դեռ ամեն ինչ հանգիստ է: Ինչպես PanARMENIAN.Net ի թղթակցին է հայտնել հանրահավաքի մասնակիցներից մեկը, մասնակիցները դեռևս ոչ մի սադրանք ադրբեջանցիների կողմից չեն նկատել: Նա հավելել է, որ հանրահավաքում արդեն ելույթ են ունեցել հրեական և քրդական համայքների ներկայացուցիչները:

Հանրահավաքի կազմակերպիչն է «Ռուս-հայկական համագործակցությունը», որը համաձայնեցերել է ակցիայի անցկացումը Մոսկվայի քաղաքապետարանի հետ: Միջոցառմանը աջակցում են նաև Ռուսաստանի այլ հայկական կազմակերպություններ:

Դատելով ադրբեջանական ԶԼՄ-ների հրապարակումներից` Մոսվկայի ադրբեջանցիները մտադիր են սադրանք կազմակերպել հայկական կազմակերպությունների ցույցի ժամանակ: Մասնավորապես, Vesti.az կայքում հրապարակվել է «Այսօր Մոսկվայի կենտրոնը կարող է ներկվել հայ սադրիչների արյունով» հոդված, որում նշվում է. «Մոսկվայի իշխանությունները նախազգուշացվել են այն մասին, որ այսօրվա ցույցի ժամանակ ադրբեջանցիների և հայերի միջև կարող են բախումներ լինել: Իսկ այդ բախումները միանգամայն հավանական են, քանի որ Մոսկվայի ադրբեջանական երիտասարդությունը մտադիր չէ ձեռքերը ծալած նստել… Հայերի ցույցին ուշադիր կհետևեն մի քանի տասնյակ երիտասարդ ադրբեջանցիներ: Արդեն մի քանի օր մենք պատրաստվում ենք այսօրվա ցույցին: Մենք ադրբեջանական երիտասարդության խումբ ենք` կրթություն ստացած մոսկովյան բուհերում: Մեր տղաները (20-25 հոգի) կցրվեն «Կրանսոպրեսնենսկայա զաստավա» հրապարակով: Նրանք կհետևեն ցույցին, դրա մասնակիցների գործողություններին և ելույթներին: Եթե հայերը թույլ տան իրենց վիրավորել Ադրբեջանը կամ նրա ժողովրդին կամ, Աստված չարասցե, համարձակվեն այրել Ադրբեջանի դրոշը, ապա մենք իսկույն կմիջամտենք: Մենք արդեն նախազգուշացրել ենք հայ երիտասարդությանը, որ կողմնակի դիտորդներ չենք լինելու»: