Փոխվարչապետը հանդիպել է Ռաս ալ Խայմա էմիրության կառավարչի հետ

PanARMENIAN.Net - ՀՀ փոխվարչապետ, տարածքային կառավարման նախարար Արմեն Գևորգյանն ԱՄԷ կատարած աշխատանքային այցի շրջանակում այսօր հանդիպեց Ռաս ալ Խայմա էմիրության կառավարիչ շեյխ Սաուդ բին Սակր ալ Քասիմիի հետ:

Քննարկվեցին Հայաստանի հետ էմիրության տնտեսական համագործակցությանն առնչվող հարցեր, անդրադարձ եղավ էմիրության կողմից Հայաստանում իրականացվող ներդրումային ծրագրերի ընթացքին ու փոխգործակցության ընդլայնման հեռանկարներին: Փոխվարչապետն ընդգծեց Ռաս ալ Խայմայի կարևոր դերը Հայաստան- ԱՄԷ համագործակցության մեջ և հույս հայտնեց, որ հետագա փոխշահավետ ծրագրերի իրականացումը կնպաստի երկկողմ առևտրատնտեսական կապերի ընդլայնմանը:

Ռաս ալ Խայմայի կառավարիչը մասնավորապես անդրադարձավ հանքարդյունաբերության ոլորտում իրականացվող ծրագրերին և դրանց ընդլայնման մտադրություններին: Նա նաև վստահություն հայտնեց, որ «Մաջիդ ալ Ֆուտտեյմ» ընկերության հետ իրենց համագործակցությունը` Երևանի Ավան թաղամասում ներդրումային ծրագրի հետ կապված, նույնպես կնպաստի երկկողմ առևտրատնտեսական կապերի ամրապնդմանը:

Զրուցակիցները կարևորեցին փոխայցելությունների կազմակերպումը, որոնք լրացուցիչ խթան կհանդիսան կապերի ակտիվացման, փոխգործակցության նոր հնարավորությունների բացահայտման համար: Երկուստեք անհրաժեշտ համարվեց նաև գործարարների ուղիղ շփումների կազմակերպումը, որի համար լավ հնարավորություն կարող են լինել նաև երկու երկրների միջև կազմակերպվող գործարար համաժողովները:

Նշենք, որ Հայաստանի կառավարության և Ռաս ալ Խայմայի էմիրության միջև 2007թ. ստորագրվել է տնտեսական համագործակցության վերաբերյալ փոխըմբռնման հուշագիր:

ՀՀ փոխվարչապետն ավարտելով աշխատանքային այցը Արաբական Միացյալ Էմիրություններ` մեկնեց Իրաքի Հանրապետություն, որտեղ Ա. Գևորգյանի համանախագահությամբ նոյեմբերի 7-ին տեղի կունենա Տնտեսական համագործակցության հարցերով հայ-իրաքյան միջկառավարական համատեղ հանձնաժողովի առաջին նիստը, հայտնում է ՏԿՆ հասարակայնության հետ կապերի բաժինը: