«Մեղրի» ՀԷԿ-ի կառուցումը կխթանի հայ-իրանական տնտեսական հարաբերությունների զարգացումը

«Մեղրի» ՀԷԿ-ի կառուցումը կխթանի հայ-իրանական տնտեսական հարաբերությունների զարգացումը

PanARMENIAN.Net - «Մեղրի» ՀԷԿ-ի կառուցումը կխթանի հայ-իրանական տնտեսական հարաբերությունների զարգացումը: Նման կարծիք են հայտնել Հայաստանի նախագահ Սերժ Սարգսյանն ու ՀՀ և ԻԻՀ միջկառավարական համատեղ հանձնաժողովի իրանական կողմի համանախագահ, Իրանի էներգետիկայի նախարար Մաջիդ Նամջուն Արաքս գետի վրա ՀԷԿ-ի հիմնարկեքի արարողությունից հետո ունեցած հանդիպման ժամանակ:

Մաջիդ Նամջուն վստահեցրել է, որ Հայաստանի էներգետիկայի նախարարի հետ շարունակելու են էներգետիկ և այլ ոլորտներում նախատեսված համատեղ ծրագրերի իրականացման ուղղությամբ շահագրգիռ և ակտիվ աշխատանքը՝ ի նպաստ երկու բարեկամ ժողովուրդների և պետությունների:

Հայաստանն ու Իրանը ՀԷԿ-ի շինարարության մասին համաձայնագիրը ստորագրել են 2007թ., այն վավերացվել է ՀՀ և Իրանի խորհրդարաններում 2008-ին: 2011թ. դեկտեմբերի 23-ին Հայաստանի ու Իրանի նախագահները հանձնարարել են երկու երկրների նախարարներին ձեռնամուխ լինել նախագծի գործնական իրականացմանը 2012թ.:

Հայաստանն ու Իրանը սահմանային Արաքս գետի վրա կկառուցեն Հարավային Կովկասի երկու ամենահզոր ՀԷԿ-երը՝ հայկական կողմից այն կլինի Մեղրիում, իսկ Իրանի կողմից՝ Կարաչիլարում: Շինարարությունը զուգահեռ կընթանա, ինչը թույլ կտա օպտիմալացնել ծախսերը 10-15 տոկոսով:

Կայաններից յուրաքանչյուրը տարեկան կտա 793 մլն կՎտ/ժ էլեկտրաէներգիա: Մեղրիի ՀԷԿ-ի հաշվարկային հզորությունը կկազմի 130ՄՎտ: Շինարարությունը կտևի 5 տարի, այն գնահատվում է 323 մլն դլոար, որը կներդնի Իրանական ներդրումային ընկերությունը:

Շինարարության ավարտից հետո օբյեկտը 15 տարի կշահագործի իրանական Farat-Sepasat ընկերությունը: Արտադրված էլեկտրաէներգիան կառաքվի Իրան, որի հաշվին կմարվի իրանական կողմի ներդրված գումարը: 15 տարի շահագործվելուց հետո ՀԷԿ-ը կդառնա Հայաստանի սեփականությունը:

 Ուշագրավ
Ուսումնասիրությունները մեկնարկել են Փաշինյանի հանձնարարությամբ
Երասխում պողպատի գործարանի կառուցման համար ընկերությունը ներդրել էր 2 միլիարդ դրամ
Ըստ ֆինանսների նախարարության՝ միջպետական վարկի մնացորդն ուղղվելու է բռնի տեղահանված անձանց աջակցությանը
Կապահովվի խաղողի մթերումների գործընթացի կազմակերպումը
---