Է. Նալբանդյանը` Դիվանագիտական դպրոցի ունկնդիրներին. Դիվանագիտութունը պիտի արյան մեջ լինի

PanARMENIAN.Net - Այսօր ԱԳ նախարար Էդվարդ Նալբանդյանը առաջին դասախոսությամբ հանդես է եկել ԱԳՆ դիվանագիտական դպրոցի նոր ընդունված ունկնդիրների առջև։ Այս մասին PanARMENIAN.Net ին տեղեկացնում են ԱԳՆ մամուլի, տեղեկատվության, հասարակայնության հետ կապերի վարչությունից:

Շնորհավորելով ունկնդիրներին դիվանագիտական դպրոց ընդունվելու կապակցությամբ` նախարար Նալբանդյանն ասել է, որ կրթօջախի չորրորդ սերունդը հաճախում է դիվանագիտական կադրերի պատրաստման կրթական հաստատություն, որի հիմնումը և արդյունավետ գործունեությունը արդեն կայացած փաստ է։

«Դիվանագիտութունն, իհարկե, նախևառաջ, պիտի լինի արյան մեջ, բայց այն նաև մասնագիտություն է, և ինչպես որևէ մասնագիտություն, պահանջում է հիմնավոր կրթություն։ Դուք հնարավորություն կունենաք մոտիկից ծանոթանալու դիվանագիտական արվեստին և բանակցություններ վարելու հմտությանը, Հայաստանի արտաքին քաղաքական դիրքորոշումներին ու մոտեցումներին, միջազգային իրավունքի, միջազգային տնտեսական հարաբերությունների խնդիրներին, դիվանագիտական ներկայացուցչություններում աշխատանքի նրբություններին: Դպրոցում դասավանդելու են առաջատար մասնագետներ Ռուսաստանից, Միացյալ Նահանգներից, Միացյալ Թագավորությունից, Բելգիայից, Գերմանիայից, Իսպանիայից, Սլովենիայից, Էստոնիայից, Շվեյցարիայից, Կանադայից, Նիդեռլանդներից, Չեխիայից և Ավստրիայից: Դուք հնարավորություն կունենաք նաև լսելու Հայաստան այցելող արտգործնախարարներին և միջազգային կազմակերպությունների ղեկավարներին»,- ասել է նախարար Նալբանդյանը։

Եզրափակելով խոսքը՝ Հայաստանի արտաքին քաղաքական գերատեսչության ղեկավարն ընդգծել է, որ դպրոցի յուրաքանչյուր ունկնդիր պետք է առավելագույնս օգտվի մասնագիտական գիտելիքներ ձեռք բերելու այս հնարավորությունից, որպեսզի մեկ տարի հետո կարողանա համալրել Հայաստանի դիվանագիտական ծառայության շարքերը։