Բնապահպանության նախարարը մեկնել է Գերմանիա

PanARMENIAN.Net - ՀՀ բնապահպանության նախարար Արամ Հարությունյանը փետրվարի 26-27 –ը պաշտոնական այցով մեկնել է Գերմանիայի Դաշնային Հանրապետություն: Այցի օրակարգում նախատեսված է Արամ Հարությունյանի հանդիպումը Գերմանիայի շրջակա միջավայրի, բնության պահպանության ու միջուկային ռեակտորների անվտանգության դաշնային նախարար Պետեր Ալտմայերին:

Փետրվարի 26-ին Բեռլինում ՀՀ բնապահպանության նախարարության և Գերմանիայի Դաշնային Հանրապետության շրջակա միջավայրի, բնության պահպանության ու միջուկային ռեակտորների անվտանգության դաշնային նախարարության միջև կստորագրվի համագործակցության հռչակագիր: Բնապահպանության նախարարությունից PanARMENIAN.net-ին հայտնում են, որ այցի ընթացքում նախատեսված է այցելություն աղտոտման համալիր կանխարգելման և հսկման ենթակա կազմակերպություն` ծանոթանալու լավագույն տեխնոլոգիաների և արտանետումների ու արտահոսքերի գրանցման ավտոմատ համակարգին:

Հանդիպման ընթացքում կքննարկվեն երկկողմ համագործակցության զարգացման, երկու երկրներին վերաբերող ընդհանուր հետաքրքրությունների համակարգման և բնապահպանության ոլորտի մասնագետների փորձի փոխանակման խնդիրներ. մասնավորապես՝ համագործակցություն Հայաստանի Հանրապետության և Գերմանիայի Բնության ահպանության միության (NABU) հետ, համագործակցություն InWENT կազմակերպության հետ, համագործակցություն Կովկասի տարածաշրջանում կենսաբազմազանության պահպանության գերմանական նախաձեռնության շրջանակներում իրականացված բնության հատուկ պահպանվող տարածքների ընդլայնման («Արփի լիճ» ազգային պարկ) վերաբերյալ: Գերմանիա կատարած այցի ընթացքում նախարարին ուղեկցում է Բնապահպանության նախարարության աշխատակազմի ղեկավարի տեղակալ Աշոտ Ավալյանը: