Գ. Մինասյան. Ծրագրային բյուջետավորմամբ կանցնենք առավել արդյունավետ և թափանցիկ գործընթացների

PanARMENIAN.Net - Ազգային ժողովի ֆինանսավարկային և բյուջետային հարցերի մշտական հանձնաժողովն այսօրվա նիստում Գագիկ Մինասյանի նախագահությամբ քննարկվել և հավանության է արժանացել «ՀՀ բյուջետային համակարգի մասին» և «Գանձապետական համակարգի մասին» օրենքներում փոփոխությունների՝ կառավարարության օրենսդրական նախաձեռնությունը: Հանձնաժողովի դրական եզրակացությամբ փաթեթը կընդգրկվի առաջիկա քառօրյա նիստերի օրակարգում:

Այս մասին PanARMENIAN.Net ին տեղեկացնում են ՀՀ ԱԺ հասարակայնության հետ կապերի բաժնից:

Գլխադասային հանձնաժողովը գործադիրի մասնագետների ու ոլորտի պատասխանատուների հետ արդեն իսկ նախնական քննարկումներ է ունեցել՝ սկզբունքային հարցերի շուրջ համաձայնության գալով: Ֆինանսների փոխնախարար Պավել Սաֆարյանը նիստում հիմանավորել է այս նախաձեռնության անհրաժեշտությունը՝ նշելով, որ այն ընդունելու պարագայում իրավաբանորեն կամրագրվի բյուջեի նախագծերը ծրագրային ձևաչափով կազմելու քաղաքականությունը: Այլ կերպ ասած՝ հիմնական թիրախը կլինի ծրագրերի իրակացումից ստացված արդյունքը: Պետական ծախսերի արդյունավետությունը բարձրացնելու նպատակով կառավարությունն արդեն իսկ առաջնորդվում է ծրագրային բյուջետավորման սկզբունքով, կիրառում որոշ տարրեր բյուջեի նախագծեր կազմելիս, տարեցտարի ընդլայնում ծրագրային բյուջետավորման շրջանակը: Սակայն օրենսդրորեն այս մոտեցումն ամրագրված չէ:

«Բյուջետային համակարգի մասին» օրենքում առաջարկվում է նաև հստակեցնել որոշ հասկացություններ, տալ նոր սահմանումներ, ինչպես նաև կանոնակարգել պետական և տեղական ինքնակառավարման մարմինների արտաբյուջետային հաշիվները:

Գագիկ Մինասյանը նշել է, որ ակնկալում է առաջինից երկրորդ ընթերցման միջև ընկած ժամանակահատվածում անցումը ծարագրային բյուջեին դարձնել հասարակական լայն ձևաչափով լսումների առարկա: Նրա բնորոշմամբ՝ որքան շատ մարդ շահագրգիռ լինի ծրագրային բյուջետավորմամբ, այնքան արագ հնարավոր կլինի անցնել բյուջետային առավել արդյունավետ և թափանցիկ գործընթացների: