Գագիկ Ջհանգիրյանն այցելել է ՀՀ ՊՆ քննչական ծառայություն և պատասխանել քննիչի հարցերին

PanARMENIAN.Net - Այսօր, ժամը 19:30-ին Հայ Ազգային Կոնգրեսի վարչության անդամ, ԱԺ պատգամավոր Գագիկ Ջհանգիրյանը սեփական նախաձեռնությամբ այցելել է ՀՀ ՊՆ քննչական ծառայություն և պատասխանել քննիչի հարցերին: Այս մասին տեղեկացնում են Հայ ազգային կոնգրեսի մամուլի ծառայությունը:

Ինչպես ավելի վաղ հայտնել էինք, ՀՀ նախկին զինդատախազ, ԱԺ ՀԱԿ խմբակցության պատգամավոր Գագիկ Ջհանգիրյանը հարցաքննության էր հրավիրվելու որպես Սյունիքի միջադեպի գործով վկա: Ըստ ՊՆ մամուլի ծառայության` ՀՀ ԱԺ ՀԱԿ խմբակցության պատգամավոր Գագիկ Ջհանգիրյանը, անդրադառնալով 2013թ. հուլիսի 1-ին Սյունիքի նախկին մարզպետ Սուրեն Խաչատրյանի առանձնատան մոտ կատարված հանցագործությանը, հայտարարել է.

«Տեղի է ունեցել ծանրագույն հանցագործություն: Մեկը սպանվել է, բանակի սպան, հրամանատարը ծանր վիրավորվել են: Էլի վիրավոր կա: Ես վստահ եմ, որ էդ երկուսը չեն վիրավորվել: Իմ տեղեկություններով` վիրավորների թիվն ավելի շատ է»: Գագիկ Ջհանգիրյանի կողմից ներկայացրած տեղեկատվության աղբյուրը և դրա ճշմարտացիությունը ստուգելու համար ՀՀ ՊՆ ՔԾ ՀԿԳ քննչական բաժնի վարույթում քննվող քրեական գործով քննիչի կողմից ծանուցագիր է ուղարկվել Ջհանգիրյանին` 13.06.2013թ. ժամը 10:00-ին ՀՀ ՊՆ ՔԾ ՀԿԳ քննչական բաժին կանչելու և գործով որպես վկա հարցաքննելու համար:

Հիշեցնենք, որ հունիսի 1-ին, երեկոյան, Սյունիքի մարզպետ Սուրիկ Խաչատրյանի` Գորիսի Դավիթ-Բեկի փողոցի թիվ 1 հասցեում գտնվող առանձնատան դիմացի հատվածում հնչել էին կրակոցներ, ինչի արդյունքում 1970 թ. ծնված Ավետիք Բուդաղյանը ստացած հրազենային վնասվածքներից տեղում մահացել էր, իսկ 1971 թ. ծնված Արտակ Բուդաղյանը և 1975 թ. ծնված Նիկոլայ Աբրահամյանը հրազենային վնասվածքներով տեղափոխվել էին հիվանդանոց: