ԱՄՆ-ն սկսել է զենք առաքել սիրիացի գրոհայիններին

PanARMENIAN.Net - ԱՄՆ-ն սկսել է որոշ տեսակի զենք առաքել սիրիական ընդդիմությանը: Այդ մասին Վաշինգտոնում կայացած մամուլի ասուլիսում հայտարարել է Սիրիայի ընդդիմադիր և հեղափոխական ուժերի ազգային կոալիցիայի ներկայացուցիչ Հալիդ Սալեհը, հայտնում է ITAR-TASS-ը:

Ըստ Սալեհի, նա ԱՄՆ է ժամանել Թուրքիայից ընդդիմության պատվիրակության կազմում, Կոնգրեսում և վարչակազմում հանդիպումների նպատակով, որպեսզի կոչ անի ԱՄՆ օրենսդիրներին հավանություն տալ ռազմական միջամտութայնը Սիրիայում:

Մինչ այդ ԱՄՆ-ն օգնում էր ընդդիմության ուժերին, միայն «ոչ մարտական սպառազինություն» տրամադրելով նրանց: Սակայն, ինչպես ասել է Սալեհը, վերջերս «Սիրիայի ազատ բանակի Գերագույն ռազմական խորհուրդը ստանում է նաև որոշ տեսակի սպառազինություն»: Ըստ նրա, այդ խմբավորումը կարողացել է համոզել ԱՄՆ-ին, որ ամերիկյան զենքը «վատ ձեռքերում չի հայտնվի»:

Ընդ որում հենց սեպտեմբերի 10-ին ԱՄՆ նախագահը իր հեռուստաուղերձում հայտարարեց, որ ԱՄՆ-ն չի միջամտի քաղաքացիական պատերազմին Սիրիայում: «Մենք պետք է կանխենք քիմիական զենքի կիրառումն ու հետագա տարածումը»,-ասել է Օբաման: Ըստ նրա, ԱՄՆ-ն պետք է ազդանշան տա, որ թույլ չի տա զանգվածային ոչնչացման զենք օգտագործել: «Դա է իմ գնահատականը որպես գլխավոր հրամանատարի»,-ասել է նախագահը: Օբաման հաստատել է, որ Վաշինգտոնը չի կասկածում, որ սիրիական իշխանությունները մասնակից են Դամասկոսի արվարձանում քիմիական զենքի կիրառմանը:

«Սիրիայի տարածք զորքեր չեմ ուղարկի, անորոշ ժամկետով ռազմական գործողություններ չեմ ծավալի, ինչպես Իրաքում ու Աֆղանստանում, ինչպես նաև երկարատև օդային հարվածներ չեմ սկսի, ինչպես Լիբիայի ու Կոսովոյի դեպքում էր»,- ասել է Օբաման:

Միացյալ Նահանգների նախագահը նաև նշել է, որ «Ալ Քայիդա» ահաբեկչական խմբավորումը կարող է Սիրիայում քաոսի դեպքում ամրապնդել իր դիրքերը:

ԱՄՆ նախագահը նաև դիմել է Կոնգրեսին՝ առաջարկելով հետաձգել Սիրիայի վերաբերյալ քվեարկությունը, ռուսական առաջարկի պատճառով: Նա խոստովանել է, որ փոխել է մտադրությունը Ռուսաստանի առաջարկության շնորհիվ:

Ռուսաստանը Սիրիային առաջարկել է քիմիական զենքը միջազգային հանրության հսկողությանը հանձնել: Սիրիայի ԱԳՆ ղեկավարն ու երկրի վարչապետը համաձայնվել էին ռուսական այդ նախաձեռնության հետ: Քիմիական զենքի սիրիական արսենալը ամենախոշորներից է Մերձավոր Արևելքում: ԱՄՆ-ն Ասադին մեղադրում է օգոստոսի 21-ին Դամասկոսի արվարձանում քիմիական հարձակման մեջ, որի ընթացքում ավելի քան 1400 մարդ էր զոհվել: Սիրիական իշխանությունները կտրականապես հերքում են քիմիական զենքի կիրառումն ու հարձակման մեջ մեղադրում են ապստամբներին:

Մինչ Կոնգրեսն ու նախագահը փորձում են որոշում կայացնել, ԱՄՆ-ում բողոքի ակցիաներ են անցնում Սիրիայում ռազմական միջամտության դեմ: