Այգեձորում ականի վրա պայթելու հետևանքով 26-ամյա երիտասարդ է մահացել

25 սեպտեմբերի 2013 - 12:52 AMT

PanARMENIAN.Net - Այգեձորում ականի վրա պայթելու հետևանքով 26-ամյա բնակիչ է մահացել:Սեպտեմբերի 24-ին` ժամը 17.00-ին, ոստիկանության Տավուշի բաժին է ահազանգել գյուղի բժիշկն ու տեղեկացրել, որ նույն գյուղի բնակիչ, 1987 թ. ծնված Էդվարդ Դալլաքյանը գյուղին պատկանող «Նավթազի բալան» կոչվող հանդամասում, ականի վրա պայթելու արդյունքում ստացել է «աջ ոտքի միջծնկային հատվածի տրավմատիկ ամպուտացիա» վնասվածք և մահացել:

Պարզվել է, որ նույն օրը, ժամը 15.30-ի սահմաններում, երբ Դալլաքյանը խոզերին արոտավայրից տուն բերելու ժամանակ գտնվել է նշված հանդամասի հայ-ադրբեջանական հենակետերի միջնամասում գտնվող ականապատված տարածքում, ական է պայթել, ինչի հետևանքով էլ գյուղ տեղափոխվելու ճանապարհին մահացել է:

Ոստիկանությունից հայտնում են, որ նշանակվել է դատաբժշկական փորձաքննություն, կատարվում է նախաքննություն:

Երբ գյուղացիներն ու բժիշկը գնացել են օգնության, ադրբեջանցիները հարևանությամբ գտնվող հենակետից կրակ են բացել, ինչը մոտ 15 րոպե է տևել:

«Բժիշկն ամեն դեպքում հասել է, հիվանդանոց հասցնելու ճանապարհին արնաքամ է եղել և մահացել: Թևն ու ոտքը վիրավորված էին, չի կարողացել ոտքը ուժեղ կապել, որ արնաքամ չլինի»,- Panorama-ին ասել է Այգեձորի գյուղապետ Սասուն Սաֆարյանը: Նա նաև հայտնել է, որ բժիշկների հասնելու պահին երիտասարդը դեռ գիտակցությունը կորցրած չի եղել:

Tert.am-ին գյուղապետը նաև ասել է, որ ականի վրա պայթյունի վերջին դեպքը գյուղում եղել է 4 տարի առաջ։ «Միների» վրա անասունների պայթյունների դեպքերն իրենց «աչքին չի էլ երևում»:

Ուսումնասիրե՞լ է արդյոք «Հումանիտար ականազերծման ու փորձագիտական կենտրոնը» տեղանքը, թե՝ ոչ հարցին գյուղապետն ասել . «Դա ընենց տարածք չի, որ ականազերծում արվի, հակառակը, պետք է ականապատվի»:

Հղումներ թեմայով.

http://panorama.am

http://tert.am