Սահակաշվիլին քննադատել է Ռուսաստանին ՄԱԿ ԳՎ նստաշրջանում՝ ռուսները հեռացել են դահլիճից

PanARMENIAN.Net - Սեպտեմբերի 25-ին Ռուսաստանի պատվիրակությունը հեռացել է ՄԱԿ ԳՎ դահլիճից Վրաստանի նախագահ Միխայիլ Սահակաշվիլիի ելույթի ժամանակ, հայտնում է ԻՏԱՐ-ՏԱՍՍ-ը՝ ՌԴ ԱԳՆ պաշտոնական ներկայացուցիչ Ալեքսանդր Լուկաշևիչի հայտարարության վրա հղումով:

Ինչպես պարզաբանել է Լուկաշևիչը, այդ քայլին ռուսական պատվիրակության անդամները գնացել են «որպես անհամաձայնության նշան այն գնահատականների հետ, որոնք հնչեցնում էր պարոն Սահակաշվիլին Գլխավոր վեհաժողովի ամբիոնից»:

ՄԱԿ-ում ՌԴ մշտական ներկայացուցիչ Վիտալի Չուրկինն իր հերթին հայտարարել է, որ Սահակաշվիլիի ելույթը ՄԱԿ ԳՎ-ում կրում էր «հակառուսական և հակաուղղափառ բնույթ»: Վրաստանի նահագահի հոգեկան վիճակը «պրոֆեսիոնալ գնահատական է պահանջում», հայտարարել է Չուրկինը՝ հավելելով, որ «վրաց ժողովրդի համար բարեբախտաբար, մոտ է այդ մարդու քաղաքական մայրամուտը»:

Ելույթ ունենալով ՄԱԿ ԳՎ 68-րդ նստաշրջանում Միխայիլ Սահակաշվիլին խիստ քննադատության է ենթարկել Ռուսաստանին: Այդ թվում նա քննադատել է նաև Եվրասիական միության գաղափարը: Սահակաշվիլին հայտարարել է, որ Եվրասիական միությունը Եվրամիության ճիշտ հակապատկերն է, քանի որ նրա հիմքում ընկած է «նոր խորհրդային կայսրության» վերականգնման գաղափարը, ուստի այն դատապարտված է ձախողման:

Նաև Վրաստանի նախագահը դիմել է միջազգային հանրությանը՝ խնդրելով ազդել ռուս-վրացական հարաբերություններում առաջացած իրավիաճկի վրա՝ հայտարարելով, թե կասկածում է, որ դրանք կարելի է կարգավորել, «չնայած, որ Վրաստանում իշխանության է եկել նոր ղեկավարություն»:

«Չնայած հարաբերություններ հաստատելու նոր կառավարության փորձերին, Մոսկվան շարունակում է իր կոշտ գիծը: Ռուսաստանը դեմ է ամեն նորին ու առաջադեմին»,-ասել է նախագահը:

Սահակաշվիլին նշել է, որ Վրաստանը պետք է պատրաստ լինի այն ժամանակներին, երբ ռուսական զորքերը կհեռանան Վրաստանից ու Կովկասից և այն ժամանակ «վրաց ժողովուրդն իր գիրկը կընդունի աբխազ ու օս եղբայրներին»: «Եվ այդ օրն այնքան հեռու չէ, ինչպես կարծում են ոմանք»,-ասել է նա:

Վրաստանի նախագահը խոստովանել է, որ իր կառավարությունը շատ սխալներ է գործել նոր պետության կառուցման ճանապարհին, որը կողմնորոշված է արևմտյան արժեքներին: «Ես ստանձնում եմ ողջ պատասխանատվությունը, բայց մենք սխալներ ենք արել գործելիս, իսկ, ինչպես հայտնի է, ով ոչինչ չի անում, նա չի սխալվում»,-ասել է Սահակաշվիլին:

Վրաստանի նախագահը նշել է, որ Եվրոպայի հետ ինտեգրման կուրսը կշարունակվի: «Այս պայքարը պետք է տրամաբանական ելք ունենա՝ Վրաստանը պետք է անդամակցի ԵՄ-ին ու ՆԱՏՕ-ին, քանի որ մենք այդ ընտանիքի անդամներ ենք»,-ասել է նա, հայտնում է «Թրենդը»:

2008 թ. օգոստոսի լույս 8-ի գիշերը ռազմական գործողություններ սկսվեցին Հարավային Օսեթիայում: Ավելի ուշ ռուսական զորքերը գրավեցին Ցխինվալը ու ետ մղեցին վրաց զինվորականներին: Օգոստոսի վերջում Ռուսաստանը ճանաչեց Հարավային Օսեթիայի ու Աբխազիայի անկախությունը: Ի պատասխան Թբիլիսին խզեց դիվանագիտական հարաբերությունները Մոսկվայի հետ և երկու հանրապետությունները հայտարարեց գրավյալ տարածքներ: