Աշխարհի հայ ոսկերիչները կներկայացնեն աշխատանքները «YerevanShow-2013» ցուցահանդեսում

22 հոկտեմբերի 2013 - 12:01 AMT

PanARMENIAN.Net - Հայ ոսկերիչների համաշխարհային ասոցիացիայի «YerevanShow-2013» երրորդ միջազգային ոսկերչական ցուցահանդեսը կանցնի հոկտեմբերի 28-30 Երևանի Կարեն Դեմիրճյանի անվան մարզահամերգային համալիրում: Ցուցահանդեսն կանցնի ՀՀ նախագահ Սերժ Սարգսյանի հովանու ներքո:

Հայաստանն աշխարհի միակ երկիրն է, որտեղ Ոսկերչի օրը պետական տոն է համարվում, այն նշվում է ամեն տարի հոկտեմբերի վերջին կիրակի օրը:

YerevanShow-2013 մասնակիցների թվում են համաշխարհային ճանաչում ունեցող ոսկերչական և ժամագործական ընկերություններ, արտադրողներ ու դիստրիբյուտերներ Հայաստանից, Ռուսաստանից, ԱՄՆ-ից, Կանադայից, Ֆրանսիայից, Իտալիայից, Բելգիայից, Շվեյցարիայից, Թուրքիայից, ԱՄԷ-ից, Մեծ Բրիտանիայից, Լիբանանից, Եգիպտոսից, Թաիլանդից, Հոնկոնգից, Արգենտինայից, Չինաստանից, Հորդանանից, Իսրայելից, Հունաստանից և այլ երկրներից:

Իրենց մասնակցությունը ցուցահանդեսին հաստատել են ոսկերչական ոլորտի հայտնի գործիչներ, ինչպիսիք են Համաշխարհային ոսկերչական կոնֆեդերացիայի (CIBJO) նախագահ Գաետանո Կավալիերին, հայտնի Malca-Amit Global Limited ընկերության ղեկավար Նայջել Փաքսմանը և այլոք:

Ցուցահանդեսին կներկայացվեն ոսկերչական գործեր թանկարժեք ու կիսաթանկարժեք քարերից, մարգարիտներով զարդեր, ժամացույցներ, ինչպես նաև բիժուտերիա, սարքավորումներ և գործիքներ ոսկերչական արտադրության համար:

Ցուցահանդեսի շրջանակում տեղի կունենա «Ոսկերչական ոլորտի ժամանակակից վիճակը՝ խնդիրներ և հեռանկարներ» խորհրդաժողովը: Խորհրդաժողովում AJA նախագահ Գագիկ Գևորգյանը (նա նաև գլխավորում է Ռուսաստանի ոսկերիչների գիլդիան) կներկայացնի AJA ևս մեկ կարևոր նախաձեռնություն՝ Երևանում ոսկերչական ազատ տնտեսական գոտու ստեղծումը, որի իրականացման դեպքում Հայաստանը կվերածվի ոսկերչական ոլորտի առաջատար համաշխարհային կենտրոններից մեկը:

Խորհրդաժողովում կներկայացվի նաև AJA նոր հետազոտական հիմնադրամը՝ ArmenianJewellersFoundation – AJF-ն:

Ոսկերչական իրերի արտադրության ծավալը Հայաստանում 2013 թ. հունվար–օգոստոսին կազմել է 11,8մլրդ դրամ' 2012 թվականի նույն ժամանակահատվածի համեմատ ավելանալով 14,6 տոկոսով, հայտնում է հանրապետության Ազգային վիճակագրական ծառայությունը: Միաժամանակ հաշվետու ժամանակահատվածում արտադրվել է 759,1 կգ ոսկերչական իրեր՝ նախորդ տարվա նույն ժամանակահատվածի 703,9 կգ դիմաց (աճը՝ 7,8%). Ադամանդների արտադրության ծավալը Հայաստանում այս տարվա հունվար–օգոստոսին կազմել է 58 927 կարատ' 2012 թվականի հունվար–օգոստոսի համեմատ ավելանալով 49, 2 տոկոսով:

Միաժամանակ, թանկարժեք և կիսաթանկարժեք քարերի, թանկարժեք մետաղներից և դրանցից պատրաստած իրերի արտահանումն այս տարվա հունվար–օգոստոսին կազմել է 120,3 մլն դոլար: 2012 թ. նույն ժամանակահատվածի համեմատ աճը կազմել է 5,9 %: