Թուրքիան ինքն էլ չգիտեր, որ «ուզում է անդամակցել ՄՄ-ին». Լավրովը մեկնաբանում է Նազարբաևի առաջարկը

25 հոկտեմբերի 2013 - 14:02 AMT

PanARMENIAN.Net - Անկարան շահագրգռված է զարգացնելու հարաբերությունները, այլ ոչ թե անդամակցելու Մաքսային միությանը, պնդում է ՌԴ ԱԳՆ ղեկավար Սերգեյ Լավրովը՝ մեկնաբանելով Ղազախստանի նախագահ Նուրսուլթան Նազարբաևի հայտարարությունը, որը մեծ անակնկալ էր հենց Թուրքիայի համար:

«Գիտեմ, որ հետաքրքրություն են հայտնում ոչ այնքան ՄՄ-ին միանալու հարցում, որքան միության հետ հարաբերությունները զարգացնելու վերաբերյալ»,-հայտարարել է Լավրովը, գրում է «Կոմերսանտը»:

Ըստ նրա, օրերս Մոսկվա կատարած այցի ժամանակ Հնդկաստանի վարչապետ Մանմոհան Սինգխը նույնպես շահագրգռվածություն հայտնեց ՄՄ-ին մերձենալու հարցում՝ այն է, ազատ առևտրի գոտու ստեղծման առումով: Այդ նույն թեմայով ՄՄ-ն դեռ անցյալ տարվանից բանակցում է Վիետնամի, Նոր Զելանդիայի ու Ազատ առևտրի եվրոպական ասոցիացիայի հետ:

«Հետաքրքրությունը, որ հայտնում են այլ երկրները, բնական է և լիովին կառուցողական է ընդունվում մեր եռյակի կողմից,-հավաստիացրել է Լավրովը:-Մաքսային միությունը փակ դաշինք չէ, այն բաց է այլ երկրների հետ համագործակցության համար»:

Աղբյուրը Թուրքիայի ԱԳՆ-ում հայտնել էր, որ Նուրսուլթան Նազարբաևի հայտարարությունն այն մասին, թե Անկարան ուզում է ոչ թե ուղղակի զարգացնել հարաբերությունները Մաքսային միության հետ, այլ հենց անդամակցել նրան, «անակնկալ» դարձավ թուրքական կողմի համար:

Նախօրեին Ղազախստանի նախագահ Նուրսուլթան Նազարբաևն առաջարկել է լուծարել Եվրասիական Տնտեսական Ընկերակցությունը (ԵվրԱզԷՍ): Նա բացատրել է դա նրանով, որ արդեն գոյություն ունի Մաքսային միություն, իսկ երկու զուգահեռ կազմակերպությունների անհրաժեշտություն այսօրվա դրությամբ չկա:

Նա նաև առաջարկել է Թուրքիային ևս ընդունել Մաքսային միության շարքերը: «Թուրքիայի նախագահը դիմել է ինձ ՄՄ-ին անդամակցելու խնդրանքով: Եկեք ընդունենք Թուրքիային»,-ասել է Նազարբաևը Մինսկում Եվրասիական տնտեսական բարձրագույն խորհրդի նիստում:

Ըստ նրա, արտերկրում նրան հաճախ են հարցնում, թե «մենք ի՞նչ ենք ստեղծում՝ ԽՍՀՄ թե Ռուսաստանի գլխավորությամբ ինչ-որ բան»:

«Գուցե Թուրքիային ընդունենք, մեծ երկիր է, ու այդ խոսակցությունները վերջանա՞ն»,-առաջարկել է Նազարբաևը ՌԴ և Բելառուսի նախագահներին:

«Նույն հետաքրքրվածությունը ՄՄ հանդեպ ունի նաև Հնդկաստանը, որը կցանկանար ՄՄ հետ ազատ առևտրի գոտու ստեղծման մասին պայմանագիր կնքել»,-հայտարարել է ՌԴ նախագահ Վլադիմիր Պուտինը: Նա վստահ է, որ հարկավոր է շատ զգուշավոր մոտենալ ՄՄ ընդլայնմանն ու միասնական պահանջներ ներկայացնել բոլոր թեկնածուներին:

Հղումներ թեմայով.

http://kommersant.ru

Մաքսային միություն

Մաքսային միությունն իր աշխատանքը սկսել է 2010 թվականին: Սկզբում միությանն անդամկցում էին Ռուսաստանը, Բելառուսն ու Ղազախստանը: Հետագայում միությանն անդամակցելու մտադրության մասին հայտարարեցին նաև Ղրղզստանն ու Տաջիկստանը:

2013-ի սեպտեմբերի 3-ին Մոսկվայում Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարել է Մաքսային միությանը միանալու և հետագայում ԵվրաԱզԷՍ-ի ձևավորմանը մասնակցելու ՀՀ ցանկության մասին: Ռուսաստանի նախագահ Վլադիմիր Պուտինը հավանություն է տվել նախաձեռնությանը՝ պատրաստակամություն հայտնելով աջակցել այդ գործընթացին: Պուտինը հավելել է, որ ՌԵՈւ-ն կարող է մոտ 15 մլրդ ռուբլի ներդնել Հայաստանի երկաթուղային ցանցի զարգացման մեջ:

Պաշտոնական ձևակերպման համաձայն, Մաքսային միությունը Բելառուսի, Ղազախստանի ու Ռուսաստանի առևտրատնտեսական ինտեգրման ձև է․ այն միասնական մաքսային տարածք է նախատեսում, որի սահմաններում փոխադարձ առևտրի դեպքում մաքսային տուրքեր ու տնտեսական բնույթի սահմանափակումներ չեն կիրառվում, բացառությամբ միայն հատուկ պաշտպանիչ, հակադեմպինգային ու հատուցման միջոցների: Ընդ որում մասնակից երկրներն օգտվում են միասնական մաքսային սակագնից և առևտրի կանոնակարգման միասնական միջոցներից երրորդ երկրների հետ: Մաքսային միության միասնական մաքսային տարածքը կազմում են Բելառուսի, Ղազախստանի ու Ռուսաստանի տարածքները, ինչպես նաև այդ պետությունների տարածքներից դուրս գտնվող արհեստական կղզիներ, շինություններ, սարքեր ու այլ օբյեկտներ, որոնց հանդեպ ՄՄ անդամ պետությունները բացառիկ իրավատիրություն ունեն: