Դինքի սպանության գործով գլխավոր մեղադրյալներից մեկն ազատ է արձակվել

11 մարտի 2014 - 11:31 AMT

PanARMENIAN.Net - Agos թերթի գլխավոր խմբագիր Հրանտ Դինքի սպանության գլխավոր մեղադրյալներից մեկը՝ Էրհան Թունջելը, Թուրքիայի նախագահ Աբդուլա Գյուլի հրամանով ազատ է արձակվել։ Համապատասխան որոշումը մարտի 8-ին հրապարակվել է Resmi Gazete պաշտոնական տեղեկատուում։ Էրհան Թունջելը բանտարկված էր Թեկիրդագ փակ բանտում։ Հայ լրագրողի սպանությանը մասնակցելու համար նա ազատազրկվել էր 5 տարի ու 5 ամիս ժամկետով, գրում է Milliyet-ը։

Հարազատ՝ Էլյազիգ քաղաքի օդանավակայանում Թունջելին դիմավորել են հարազատներն ու ընկերները։ Նրա ազատությունը ողջունել է նաև Թուրքիայի գլխավոր շտաբի նախկին ղեկավար, գեներալ Իլկեր Բաշբուգը, ում մարտի 6-ին ազատ էին արձակել։

Հրանտ Դինքի սպանության գործով նոր դատախազ է նշանակվել Մուրատ Ինամը, որը փոխարինեց Մուամմեր Աքաշին, ում պաշտոնից հեռացրել էին 2014-ի հունվարին: Ինամն արդեն ստացել է գործի բոլոր նյութերը: Աքաշը պաշտոնից հեռացվել է, քանի որ մտադիր էր ընդլայնել կոռուպցիայի համար մեղադրվող պաշտոնյաների ցուցակը և ինքն էր արտոնել «Մեծ կաշառքի» գործով ձերբակալությունները:

Դատարանի առջև կրկին 18 կասկածյալ կկանգի, որոնցից Էրհան Թունջելն ու Էրսին Յոլչուն առաջին նիստում արդարացվել էին։

Սեպտեմբերի 17-ին Ստամբուլում վերսկսվել էր Դինքի սպանության նախապատրաստման մեղադրանքով կասկածյալ Էրհան Թունջելի դատը: Դատարանը ձերբակալության թույլտվություն էր տվել, սակայն Թունջելն ազատ էր արձակվել սպանության գործով առաջին իսկ որոշումից հետո:

2012-ի հունվարի 17-ին դատարանը մեղավոր էր ճանաչել 19 մարդու «ահաբեկչական կազմակերպության անդամներ» մեղադրանքով: Յասին Հայալը ցմահ բանտարկության էր դատապարտվել, անմիջական հանցագործ Օգյուն Սամասթը՝ 23 տարվա ազատազրկման: Մեղադրյալներն անցնում էին Թուրքիայի ՔՕ 220 հոդվածով՝ սպանության կազմակերպում ու իրագործում:

Photo: Haberturk

Հղումներ թեմայով.

Milliyet