ԵԽԽՎ-ում բարձրացվել է Ադրբեջանում պահվող հայ ռազմագերիների հարցը

PanARMENIAN.Net - ԵԽԽՎ հայկական պատվիրակության անդամ Նաիրա Զոհրաբյանը մարտի 16-ին Փարիզում մասնակցել է ԵԽԽՎ միգրացիայի, փախստականների և տեղահանված անձանց մշտական հանձնաժողովի նիստին, որտեղ քննարկվել է ռազմական կոնֆլիկտների և սառեցված հակամարտությունների ժամանակ անհայտ կորածների և գերիների խնդիրը։

Հայ պատվիրակը ելույթ է ունեցել` նշելով իր ուրախությունն առ այն, որ Վեհաժողովը սկսել է առավել հաճախ անդրադառնալ տարբեր ռազմական կոնֆլիկտների, սառեցված հակամարտությունների ժամանակ անհետ կորածների, գերիների խնդիրներին, գրում է «Առավոտը»։

«Մենք իրավունք չունենք ասելու, թե այդ հարցերով զբաղվում է Կարմիր Խաչը և մենք անելիք չունենք։ Սա շատ վտանգավոր թեզ է, որովհետև մեր կառույցի հիմնարար սկզբունքներից մեկը հենց մարդու իրավունքների պաշտպանությունն է։ Մասնավորապես, գերիների, ռազմագերիների խնդրով զբաղվելու հարցում ես բնավ չեմ ուզում կասկածի տակ առնել Կարմիր Խաչի իրապես կարևոր առաքելությունն ու գործունեությունը, սակայն, եկեք լինենք անկեղծ՝ միշտ չէ, որ Կարմիր Խաչի ջանքերը անհրաժեշտ չափով արդյունավետ են լինում, որովհետև Կարմիր Խաչը, օրինակ, կարող է բախվել մի այնպիսի պետության իշխանության գործելաոճի հետ, ինչպիսին Ադրբեջանն է»,- ասել է Նաիրա Զոհրաբյանը։

Նա պատմել է երկու շաբաթ առաջ Կարմիր Խաչի ջանքերով Ադրբեջանից Հայաստան վերադարձված 77-ամյա Մամիկոն Խոջոյանի մասին, որը, մոլորվելով տեղանքում, գերի էր ընկել Ադրբեջան. «Ես անկարող եմ անգամ նկարագրել, թե ֆիզիկական և հոգեբանական ինչպիսի կտտանքների են Ադրբեջանում ենթարկել հայ ծերունուն։ Նա հայրենիք է վերադարձվել հրազենային վնասվածքով, բազմաթիվ կոտրվածքներով, առ այս պահը գրեթե որևէ մեկին չի ճանաչում և բժիշկները այժմ պայքարում են Մամիկոն Խոջոյանի կյանքի համար։ Այդ ի՞նչ պիտի աներ 77-ամյա ծերունին, որ նրան այդպես խոշտանգեին»:

Զոհրաբյանը հիշեցրել է, որ Ադրբեջանում ռազմական գերության մեջ է հայ զինվոր Հակոբ Ինջիղուլյանը, ինչպես նաև` քաղաքացիական այլ անձինք։ Նա նշել է, որ Ադրբեջանը, ի վերջո, ԵԽ անդամ երկիր է և կան բոլոր լծակները՝ այդ երկրից պահանջելու հարգել իր իսկ ստորագրած միջազգային կոնվենցիաներն ու առաջին հերթին` Ժնևյան կոնվենցիան։

«Ես ուզում եմ կոնկրետ առաջարկով հանդես գալ՝ եկեք ընդլայնենք ԵԽ մարդու իրավունքների հանձնակատարի մանդատը, որպեսզի նա անմիջական իրավասություն ունենա Կարմիր Խաչի հետ համատեղ զբաղվելու ռազմագերիների, գերության մեջ հայտնված քաղաքացիական անձանց խնդիրներով։ Կրկնում եմ, պետք չէ ասել, թե դա բացառապես Կարմիր խաչի գործն է։ Դա նաև մեր գործն է և մենք իրավունք ունենք, որպես ԵԽԽՎ օրենսդիրներ, զբաղվելու ԵԽ տարածքում անհայտ կորածների, գերիների խնդիրներով։ Ես առաջարկում եմ նաև Կարմիր Խաչի հետ համատեղ նիստ գումարել՝ քննարկելու ԵԽ անդամ երկրներում այսօր տիրող իրավիճակն այդ հարցում»,- ԵԽԽՎ նիստում ասել է բանախոսը:

Նաիրա Զոհրաբյանը հունվարի 28-ին տեղի ունեցած ԵԽԽՎ նիստում ԵԽ գլխավոր քարտուղար Թյորբորն Յագլանդի ելույթի ժամանակ հիշեցրել էր` Հակոբ Ինջիղուլյանի` արդեն մի քանի ամիս Ադրբեջանում պատանդի կարգավիճակում պահվելու մասին, ինչին ի պատասխան Յագլանդն ասել էր. «Ինձ համար մի քիչ դժվար է կոնկրետ այդ դեպքի համար որևէ մեկնաբանություն անելը, սակայն մենք աշխատում ենք Կարմիր Խաչի հետ և պաշտպանում ենք նրանց քայլերը: Ցավոք սրտի, հակամարտություններով զբաղվելը մեր կառույցի իրավասության մեջ չէ և կողմերից որևէ մեկը մեզ չի դիմել, որ մենք զբաղվենք այդ հակամարտությամբ: Սակայն, մենք պետք է անենք հնարավորը, որ ԵԽ անդամ երկրները կարողանան լուծել վիճահարույց հարցերը»:

Կարմիր Խաչի միջազգային կոմիտեի Բաքվի գրասենյակի ներկայացուցիչները մարտի 12-ին այցելել են Ադրբեջանում գտնվող ՀՀ 7 քաղաքացիներին` ռազմագերի Հակոբ Ինջիղուլյանին, ինչպես նաև` Արսեն Խոջոյանին ու 5 անդամից բաղկացած հայկական ընտանիքին: Տեսակցման ընթացքում տեղի է ունեցել ընտանեկան բովանդակությամբ նամակների փոխանակում:

Բժշկական կենտրոն հիվանդին տեղափոխելուց անմիջապես հետո կազմվել էր հետազոտման պլան: Կատարվել էին կրծքի, կոնքի, աջ բազկի և նախաբազկի ռենտգեն քննություններ, որովայնի սոնոգրաֆիա, արյան անհրաժեշտ բոլոր հետազոտությունները, ինչպես նաև գլխի համակարգչային շերտագրում: