Պարտադիրը նպատակային սոցվճար դարձնող օրինագիծն ընդունվեց. Քառյակը կդիմի ՍԴ (թարմացված)

21 հունիսի 2014 - 12:22 AMT

PanARMENIAN.Net - 66 «կողմ», 0՝ «դեմ» ու «ձեռնպահ» ձայների հարաբերակցությամբ խորհրդարանը հունիսի 21-ի արտահերթում երրորդ ընթերցմամբ ընդունել է«Կուտակային կենսաթոշակային համակարգում փոփոխություններ և լրացումներ կատարելու մասին» օրենքի նախագիծը:

Նշենք, որ քվորում ապահովելու համար անհրաժեշտ է 66 պատգամավորի գրանցում։

Առավոտյան առաջին ընթերցումից հետո, երբ հանրապետականների ձայներով քվեարկությունն անցել է ու համապատասխան օրենքներն ընդունվել, խորհրդարանական ոչ իշխանական ուժերը լքել են դահլիճը՝ բոյկոտելով քվեարկությունն ու այդպես էլ չեն վերադարձել՝ մասնակցելու երկրորդ ու երրորդ ընթերցմանը։

Մինչև առաջին քվեարկության մեկնարկը հիմնական զեկուցող ՀՀ աշխատանքի և սոցիալական հարցերի նախարար Արտեմ Ասատրյանն ասել է, որ որոշ փոփոխություններ են կատարվել, հստակեցվել է պարտադիր ֆոնդ հասկացողությունը, սա եղել է ՀԱԿ պատգամավոր Արամ Մանուկյանի առաջարկը: Պարտադիր կուտակային բառը փոխվել է կուտակային բառով, այսինքն՝ խմբագրական փոփոխություններ են կատարվել:

Ավելի ուշ ԲՀԿ խմբակցության քարտուղար Նաիրա Զոհրաբյանը խորհրդարանական ոչ իշխանական ուժերի համատեղ ասուլիսում ընթերցել է ԱԺ ոչ իշխանական ուժերի համատեղ հայտարարությունը, որն ընդունվել է առավոտյան քվեարկությունից հետո.

«ԱԺ այսօրվա նիստի ընթացքում ԱԺ ղեկավարությունը բազմիցս խախտեց կանոնակարգ օրենքը` սահմանափակելով պատգամավորների իրավունքները: Ոչ իշխանական ուժերը փորձեցին կասեցնել առանց հանրային քննարկումների խորհրդարանին պարտադրված մի շարք վիճահարույց օրենքների փաթեթների քննարկումը: Օրակարգում ներառված էր նաև ժողովրդի կողմից մերժված կենսաթոշակային բարեփոխումների վերաբերյալ օրենքը, որը փորձ արվեց անցկացնել Սահմանադրության, ԱԺ կանոնակարգ օրենքի կոպտագույն խախտումներով: Նման գործելաոճը խարխլում է մեր պետության դիրքերը: Մենք հայտարարում ենք, որ քվեարկությունն անվավեր է, դատապարտում ենք այսօրինակ գործելաոճը և հայտարարում, որ շարունակելու ենք պայքարել օրենքի դեմ»:

Պատգամավորը նշել է, որ ճգնաժամային այս իրավիճակն առաջ է բերում մի շարք խնդիրներ, որոնք ԱԺ կանոնակարգ օրենքում կանոնակարգման խնդիր ունեն, մասնավորապես` ինչ ընթացակարգեր պետք է իմպերատիվ կերպով պահպանվեն և եթե խախտվում են` պատժվեն:

ՀՅԴ խմբակցության քարտուղար Աղվան Վարդանյանն էլ ասել է, որ այսօրվա իշխանությունները ոչ թե փորձում են համախմբել հանրությանը և միասին լուծել մարտահրավերները, այլ նման կերպ են գործում հանրության մոտ հուսահատություն առաջացնելու համար:

«Մենք կդիմենք Սահմանադրական դատարան` վիճարկելու ստեղծված իրավիճակը և օրենքի խախտումով տեղի ունեցած քվեարկությունը»,- նշել է պատգամավորը` տեղեկացնելով, որ որևէ մեկը չի կասկածում` քաղաքական մեծամասնությունն այսօր կընդունի «Կուտակային կենսաթոշակների մասին» օրենքը:

«Ժառանգություն» խմբակցության ղեկավար Ռուբեն Հակոբյանն էլ նշել է, որ «Օրինաց երկիրը» ոչ միայն պաշտպանում է քառյակի համատեղ հայտարարությունը, այլև միանում է դրան, ինչի մասին նրանք դեռ կասեն:

Հունիսի 19-ին խորհրդարանում մեկնարկել է «Կուտակային կենսաթոշակների մասին» օրենքում փոփոխություն կատարելու նախագծի և կից ներկայացված օրենքների փաթեթի քննարկումը:

Սոցապ նախարար Արտեմ Ասատրյանը հայտարարել է, որ օրենքի փոփոխության հիմքում երկու խնդիր է` Սահմանադրական դատարանի ապրիլի 2-ին ընդունած որոշմամբ հակասահմանադրական ճանաչված դրույթների համապատասխանեցումը Սահմանադրությանը և հասարակության մտահոգությունները:

«Ներկայացված փաթեթն ընդունելու դեպքում հուլիսի 1-ից, երբ օրենքներն ուժի մեջ մտնեն, այլևս պարտադիր կուտակային վճար չի կատարվելու: Օրենքով սահմանվում է պետական բյուջե վճարվող նպատակային սոցիալական վճար»,- ներկայացրել է նախարարը:

Նախօրեին խորհրդարանական խմբակցությունների անունից եզրափակիչ ելույթների ժամանակ պարզվել է, որ ԱԺ 5 խմբակցություն դեմ է «Կուտակային կենսաթոշակների մասին» օրենքին փոխարինող Կառավարության կողմից ներկայացրած «Նպատակային սոցիալական վճարների» մասին նախագծի փաթեթին։

«Ժառանգություն» խմբակցության անունից ելույթ է ունեցել ղեկավար Ռուբեն Հակոբյանը` նկատելով, թե կուտակայինի շուրջ քննարկումները չեն դադարում, քանի որ իշխանությունը չի կարողանում պատասխանել, թե ինչու է ծանր սոցիալական պայմաններում ապրող ժողովրդի վզին փաթաթում այս օրենքը։

«Եթե կառավարությունը պատգամավորներին կանչում է հանդիպման, հետո մի քանի ֆոտո դնում, թե տեսեք՝ հանդիպել և քննարկել ենք, ապա նշեմ, որ դա էժանագին PR է, քանի որ այդ հանդիպումներից հետո ոչինչ չի փոխվում, և Ազգային ժողով բերվում է այն նախագիծը, որն արդեն որոշված է եղել»,- նշել է նա։

ՀՅԴ անունից խոսել է Արծվիկ Մինասյանը` նշելով, որ իրենց համար այս փաթեթն անընդունելի է, քանի որ չի համապատասխանում Սահմանադրական դատարանի կողմից պահանջվող բոլոր փոփոխություններին և չի ներառում հանրության կարծիքը՝ առանց քննարկումների փորձ է արվում անցկացնել այն։

ՀՅԴ պատգամավորը մանրամասն ներկայացրել է խմբակցության սկզբունքային դիրքորոշումները, որը կառուցված է ՍԴ-ի որոշման դրույթների հիման վրա և նաև նկատի առել G20-ի տնտեսական գործակցության միջազգային լավագույն փորձը։

Ըստ Մինասյանի՝ իրենց տարբերակում գործում է կամավորության սկզբունքը, ապահովված է այն մտահոգությունը, որ այս կառավարիչներն այլևս Հայաստանում գործ չեն կարող ունենալ, բացառում է որևէ խտրականություն և ցույց տալիս երկրի տնտեսության մեջ հնարավոր զարգացումները կամավոր կուտակումների պարագայում:

«Օրինաց երկիր» խմբակցության անունից հանդես է եկել Մհեր Շահգելդյանը` նույնպես նկատելով, թե այն նոր նախագծերի փաթեթին, որ ներկայացրել է Կառավարությունը, ՕԵԿ-ը դեմ է, քանի որ ըստ էության պարտադիր բաղադրիչը չի վերացվել, գրում է Tert.am-ը։

«Բարգավաճ Հայաստան» խմբակցության իր ելույթում Միքայել Մելքումյանը նույնպես հայտարարել է, թե իրենք դեմ են այս տեսքով ռեֆորմի իրականացմանն ու համոզված են, որ այն լուրջ կոսմետիկ վերաիմաստավորման կարիք ունի։

Հղումներ թեմայով.

Վաղուց չէինք տեսել ՀՀԿ-ին նման անկումային տրամադրության մեջ. ԱԺ 6 խմբակցություններից 5-ը դեմ են կուտակայինի նոր տարբերակին. Tert.am

ԱԺ-ն փորձում է առաջին ընթերցմամբ ընդունել «Կուտակայինի» մասին նոր նախագիծը. Լ. Զուրաբյանը 20 րոպե ընդմիջում խնդրեց. Tert.am

Оппозиционные депутаты в знак протеста покинули зал заседаний парламента Армении. Panorama.am

Оппозиционная АРФД предложила 15 базовых принципов построения новой пенсионной системы в Армении. Panorama.am

Քառյակը հրապարակեց համատեղ հայտարարությունն ու պատրաստվում է դիմել ՍԴ. Panorama.am

ՕԵԿ-ը միացել է քառյակին. Panorama.am

Պարտադիր կուտակային կենսաթոշակային համակարգ

Կենսաթոշակային բարեփոխումների մեկնարկի մասին Հայաստանը հայտարարել էր դեռ 2010-ի հուլիսին: Արդեն 2011-ի հունվարի 1-ից կենսաթոշակային ռեֆորմները մեկնարկեցին կամավոր կուտակային համակարգի ներդրմամբ։

2014-ի հունվարի 1-ից Հայաստանն անցավ պարտադիր կուտակային համակարգի, որը վերաբերում է 1973-ի դեկտեմբերի 31-ից հետո ծնվածներին, որոնք աշխատում են և գրանցված են աշխատավայրում: Մինչև 500 հազար դրամ աշխատավարձ ստացողները վճարումներ կկատարեն իրենց աշխատավարձի 5%-ի չափով, ևս 5%-ն այդ աշխատողների անհատական հաշիվներին կփոխանցի պետությունը։ 500 հազար դրամից ավելի աշխատավարձ ստացողի անհատական կուտակային ֆոնդին պետությունը 25 հազար դրամից ավելի չի փոխանցի:

Պարտադիր բաղադրիչի ներդրումը մեծ աղմուկ էր առաջացրել հասարակության շրջանում, ստեղծվել էին մի շարք քաղնախաձեռնություններ, որոնք մինչև օրս էլ այդ համակարգին դեմ են արտահայտվում ու շարունակում են բողոքել: Համակարգին դեմ էին նաև խորհրդարանական ոչ իշխանական 4 ուժերը, որոնք ԱԺ-ին առաջարկել էին մեկ տարով հետաձգել համակարգի ներդրումն ու շարունակել քննարկումները, քանի որ դա շատ լուրջ փոփոխություն է, իսկ«համակարգը թերի է»: 2013-ի դեկտեմբերի 4-ին հարցով հրավիրված արտահերթին խորհրդարանը դեմ էր քվեարկել կուտակային կենսաթոշակային համակարգի պարտադիր բաղադրիչի կիրառումը մեկ տարով հետաձգելու առաջարկությանը:

Հայաստանի սահմանադրական դատարանը հունվարի 24-ի նիստում որոշել էր կասեցնել «Կուտակային կենսաթոշակների մասին» ՀՀ օրենքի 76-րդ հոդվածի (այն է՝ պատասխանատվությունը պարտադիր կուտակային վճարները չկատարելու կամ ուշացմամբ կատարելու համար) և 86-րդ հոդվածի 3-րդ մասի (այն է՝ ֆոնդի և կառավարչի պարտադիր ընտրություն) գործողությունը մինչև օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ գործի դատաքննության ավարտը։

Մարտի 28-ին մեկնարկած դատական նիստի որոշումը ՍԴ-ն կայացրեց ապրիլի 2-ին՝ «Կուտակային կենսաթոշակների մասին» ՀՀ օրենքի մի քանի դրույթ ՀՀ Սահմանադրության պահանջներին հակասող ու անվավեր ճանաչելով։ 64 էջանոց համախատասխան որոշումը հրապարակել էր ՍԴ նախագահ Գագիկ Հարությունյանը։ Ըստ էության, դիմող կողմի հայցը բավարարվեց։

Դատարանը մինչև 2014-ի սեպտեմբերի 30-ն Աժ-ին և Կառավարությանը ժամանակ տվեց՝ օրենքի որոշ դրույթներ փոփոխելու համար: Մինչ այդ կատարված կենսաթոշակային բոլոր վճարումները պետք է վերանայվեն:

Ապրիլի 17-ին վարչապետը հանձնարարեց շահագրգիռ պետական մարմիններին սեղմ ժամկետում օրենքի նախագիծ պատրաստել, որով մինչև Սահմանադրական դատարանի՝ ապրիլի 2-ի որոշմամբ նախատեսված օրենսդրական փաթեթի ընդունումն Ազգային ժողովը կկասեցնի տույժերի հաշվարկը: Կառավարության առաջարկող օրենքի նախագիծն Ազգային ժողովում սկսեցին քննարկել ապրիլի 28-ին:

Արդեն մայիսի 15-ին խորհրդարանն ամբողջովին ընդունեց «Կուտակային կենսաթոշակի մասին» օրենքում փոփոխություն կատարելու մասին Կառավարության օրինագիծը: Դրանով պարտադիր կուտակային վճարը հաշվարկելու և փոխանցելու պարտավորությունը կրող անձն ազատվում է մինչև օրենքն ուժի մեջ մտնելն ընկած ժամանակահատվածի համար պարտադիր կուտակային վճարը չկատարելու կամ ուշացումով կատարելու համար օրենքով նախատեսված պատասխանատվությունից: Նախագահ Սերժ Սարգսյանն օրենքը վավերացրեց մայիսի 26-ին:

Հունիսի 17-ի արտահերթում Կառավարությունը հավանություն տվեց «Կուտակային կենսաթոշակների մասին» օրենքում փոփոխություններ և լրացումներ կատարելու օրինագծերի փաթեթին: Դրանով նախատեսվում է 2014-ի հուլիսի 1-ից պետական հատվածի աշխատողների համար գործարկել նպատակային սոցիալական վճարի համակարգը, որը մինչև 2017-ի հուլիսի 1-ը մասնավոր հատվածի համար կլինի կամավոր։ Դրա դրույքաչափը նույնպես 5 տոկոս է: Առաջարկվում է սահմանել 500․000 դրամ աշխատավարձի շեմ, որից ավելիի դեպքում սոցվճար չի կատարվելու, այսինքն՝ առավելագույն սոցվճարը բոլորի համար լինելու է 25․000 դրամ՝ կախված աշխատավարձի չափից: Նախագիծը քննարկելու համար գործադիրը ԱԺ արտահերթ նիստ հրավիրեց։

Հունիսի 21-ին խորհրդարանն արտահերթում երեք ընթերցմամբ ընդունեց «Կուտակային կենսաթոշակային համակարգում փոփոխություններ և լրացումներ կատարելու մասին» օրենքի նախագիծը, որով պարտադիր կուտակայինը դարձավ նպատակային սոցվճար։ Քվեարկությանը մասնակցեց միայն ՀՀԿ-ն։ Քվեարկությունը բոյկոտած ԱԺ ոչ իշխանական ուժերը տեղեկացրին, որ դիմելու են Սահմանադրական դատարան` վիճարկելու ստեղծված իրավիճակն ու օրենքի խախտումով տեղի ունեցած քվեարկությունը։