Թբիլիսի. Աբխազական երկաթուղու բացման շուրջ բանակցություններ չեն ընթանում

7 նոյեմբերի 2014 - 17:44 AMT

PanARMENIAN.Net - Վրաստանի հաշտեցման և քաղաքացիական հավասարության պետնախարար Պաատա Զաքարեիշվիլին մեկնաբանել է Հայաստանի տրանսպորտի փոխնախարարի հայտարարությունը աբխազական երկաթուղու հնարավոր մոտալուտ վերագործարկման մասին:

Ըստ վրացական «Մեր Աբխազիան» պորտալի, Զաքարեիշվիլին հայտարարել է, որ Աբխազիայի երկաթուղու հետ կապված ոչ մի գործընթաց չկա: «Ինչ որ երկու տարի առաջ էր կատարվում, նույնն էլ հիմա է, ոչ մի փոփոխություն չկա»,-ասել է նա:

Վրաստանի էկոնոմիկայի նախարար Գիորգի Կվիրիկաշվիլին իր հերթին, մեկնաբանելով տեղեկատվությունը, հայտարարել է, որ այս հարցի շուրջ բանակցություններ չեն ընթանում, հայտնում է apsny.ge-ն:

Աբխազական երկաթուղու վերագործարկման հարցն արդիականացավ 2012 թ. և 2013-ի ընտրություններում Սահակաշվիլիի թիմի պարտությունից հետո, երբ իշխանության եկավ վարչապետ Բիձինա Իվանիշվիլին: Նա հայտարարեց, որ պատրաստ է սեղմ ժամկետում լուծել երկաթուղու վերաբացման հարցը:

Նախօրեին ՀՀ տրանսպորտի նախարարի առաջին տեղակալ Արթուր Առաքելյանը հայտարարեց, որ Աբխազական երկաթուղու վերագործակման շուրջ փակ բանակցություններ են ընթանում, որին մասնակցում է նաև ՀՀ տրանսպորտի և կապի նախարարությունը: «Քանի որ բանակցությունները փակ են ընթանում, այսինքն՝ հարցն ավելի շատ քաղաքական է, քան տնտեսական, այնտեղ խնդիր կա պայմանավորվելու Վրաստանի և Աբխազիայի իշխանությունների միջև, երևի թե պատկերացնում եք, որ այդ խնդիրը շատ բարդ մի կծիկ է։ ՀՀ տրանսպորտի և կապի նախարարությունը ևս ներգրավված է այդ գործընթացների մեջ»,- ասել է Առաքելյանը Tert.am-ին՝ հույս հայտնելով, որ շուտով կկարողանան կարևոր հայտարարությամբ հանդես գալ:

Երկաթուղային հաղորդակցությունը Վրաստանի և ՌԴ միջև փակվեց վրաց-աբխազական պատերազմի հետևանքով, որը դարձավ Հայաստանի տնտեսական ճգնաժամի պատճառներից մեկը: Երկաթուղու վերաբացումը թույլ կտա գոնե մասնակիորեն հաղթահարել շրջափակումը: Այժմ կապը Ռուսաստանի հետ իրականացվում է Վերին Լարսի անցակետով, որը հաճախ տևական ժամանակով փակվում է եղանակային պայմանների պատճառով, կամ, ինչպես նախկինում հաճախ է եղել, վրաց-ռուսական հարաբերությունների վատթարացման հետևանքով:

Աբխազիայի հայ հանրության ներկայացուցիչները հուլիսի 8-ին հանդես եկան աբխազական երկաթուղու վերագործարկման շուրջ լայն հանրային քննարկում նախաձեռնելու առաջարկով, ինչը տնտեսապես շահավետ է Աբխազիայի համար: Փաստաթուղթը ստորագրել են խորհրդարանի փոխխոսնակ, Աբխազիայի Հերոս Վաղարշակ Քոսյանը, ինչպես նաև երկրորդ գումարման խորհրդարանի պատգամավոր, Աբխազիայի Հերոս Գալուստ Տրապիզոնյանը, Լեոնի շքանշանակիր Կարապետ Ղարագյոզյանը և չորրորդ գումարման խորհրդարանի պատգամավոր Վալերի Մայրումյանը:

Ըստ նախորդ տարվա մարտին անցկացված NDI սոցհարցման, Վրաստանի բնակիչների 63 տոկոսը կողմ է աբխազական երկաթուղու վերաբացմանը: Դեմ է արտահայտվել հարցման մասնակիցների 13 տոկոսը:

Ըստ Հայկական երկաթուղու կոնցեսիոն կառավարման մասին պայմանագրի, որը 30 տարով կառավարման է հանձնվել Ռուսական երկաթուղուն, Աբխազիայի հետ հաղորդակցության վերականգնման դեպքում, ներդրումները Հարավկովկասյան երկաթուղում պետք է կազմեն մինչև 2,1 մլրդ դոլար:

Ընթերցեք նաև. Աբխազական երկաթուղու շուրջ բանակցություններ են ընթանում. Հնարավոր է՝ շուտով վերագործարկվի

Հղումներ թեմայով.

Наша Абхазия: Закареишвили опровергает какие-либо переговоры по восстановлению железной дороги через Абхазию

Apsny.ge: Тбилиси опровергает участие в переговорах по открытию абхазского участка железной дороги