Թուրք պատգամավոր. Սահմանի ականազերծման պատճառը «հայերի տեղահանության 100-րդ տարելիցն է»

10 դեկտեմբերի 2014 - 12:08 AMT

PanARMENIAN.Net - Թուրքիան, ըստ ՄԱԿ-ի զարգացման ծրագրի, մրցույթ է հայտարարել Հայաստանի և մյուս հարևանների հետ սահմանամերձ գոտին ականազերծելու համար: Ընդդիմադիր «Ազգայնական շարժում» կուսակցության պատգամավոր Մեհմեթ Գյունալը, անդրադառնալով հարցին, նախ հիշեցրել է, որ փաստորեն թուրքական ընկերությունները դուրս են մնացել հայտարարված մրցույթից:

Ավելի վաղ Haqqin.az-ը գրել էր, թե մրցույթին մասնակցելու համար հրավիրված է նաև Ադրբեջանի տարածքի ականազերծման ազգային գործակալությունը, որը կմրցի Անգլիայի, ԱՄՆ-ի, Բոսնիայի և Հերցոգովինայի ընկերությունների հետ:

Ադրբեջանական գործակալությունը վերջերս մասնակցել է Թուրքիայի և Սիրայի սահմանին գտնվող հնամենի Քարքամիշ քաղաքի, Դիարբեքիրում ռազմաօդային ուժերի բազայի ու Կոնյա քաղաքում ROKESTAN ընկերության հրաձգարանի ականազերծման աշխատանքներին, գրում է «Առավոտ»-ը:

Ընդդիմադիր պատգամավորը նաև հարց է բարձրացրել, թե ինչու պիտի Թուրքիայի սահմանամերձ գոտիների ականազերծումն իրականացնեն Եվրամիության ֆոնդերը կամ ՄԱԿ-ի զարգացման ծրագիրը:

«Ի՞նչ է, ականազերծելու համար Թուրքիան փող չունի՞,- վրդովմունք է հայտնել Գյունալը: -Ինչո՞ւ է այդպես: Որովհետև մոտենում է հայերի տեղահանության 100-րդ տարելիցը: Ահա թե ինչու իշխանությունները և հանրապետության նախագահը կուլիսներում տված խոստումները պահել կարողանալու համար նմանօրինակ քայլերի են դիմում»,- թուրքական «Հաբերլեր»-ին հղումով ընդդիմադիր պատգամավորի խոսքերը մեջբերում է Ermenihaber-ը:

Նախատեսվում է 11.5 մլն քմ տարածք ականազերծել Հայաստանի, Իրանի և Ադրբեջանի հետ սահմանակից գոտիներում: Ծրագրի արժեքը կազմում է մոտ 80 մլն եվրո: Թուրքիան հարևանների հետ սահմանամերձ գոտիներում ականազերծման աշխատանքները ցանկանում է կատարել իր չափանիշները Եվրամիության սահմանների համալիր կառավարման քաղաքականության և ռազմավարության հետ համապատասխանեցնելու նպատակով: Ականամաքրումից հետո պիտի ներդրվեն սահմանների վերահսկման ավելի մարդասիրական և արդյունավետ ժամանակակից համակարգեր:

Հղումներ թեմայով.

Հայ-թուրքական սահմանը կականազերծեն Ադրբեջանի՞ սակրավորները. Առավոտ

Թուրք պատգամավորը սահմանի ականազերծման հարցը կապել է Հայոց ցեղասպանության 100-րդ տարելիցի հետ. Ermenihaber

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: