Թուրք աշակերտները կոչ են անում վերակառուցել Իզմիրում հայկական եկեղեցին և այն թանգարան դարձնել

6 հունվարի 2015 - 13:12 AMT

PanARMENIAN.Net - Իզմիրի դպրոցներից մեկի աշակերտները պատմության և աշխարհագրության դասին շրջակայքում արած «պատմության զբոսանքի» ընթացքում ուշադրություն են դարձրել մի բանի, ինչը տեղի պաշտոնյաները «չէին նկատել»: Նրանք այցելել են 19-րդ դարում կառուցված հայկական եկեղեցի և ականատես եղել, թե ինչպես է այն վերածվել ախոռի, գրում է Tert.am-ը՝ Taraf պարբերականին հղումով:

Աշակերտները կոչ են արել վերակառուցել եկեղեցին և այն թանգարանի վերածել՝ զարմանալով եկեղեցում նման տեսարանից:

Կառույցի շինության հստակ թվականը հայտնի չէ, սակայն տեղեկություններ կան, որ այն շարունակել է գործել մինչև 1922-ը: Հայերի բռնի տեղահանությունից հետո որոշ ժամանակ այն որպես ռազմական պահեստ է ծառայել, իսկ այժմ այնտեղ կենդանիներ են պահում:

Արևմտյան Հայաստանում և Թուրքիայում հայկական մշակութային ժառանգությունը պարբերաբար ոչնչացվել է՝ հայերից բացի թուրքերը կանխամտածված ոչնչացրել են նաև հայկական քաղաքակրթության նյութական վկայությունները:

Վերջին տարիներին այդ երկրի իշխանությունը սկսել է որոշ հայկական կոթողներ վերականգնել, ինչի նպատակը միջազգային հեղինակությունը բարձրացնելու, ինչպես նաև զբոսաշրջությունը զարգացնելու և եկամտի նոր աղբյուր ունենալն է: Բայց ոչ բոլոր եկեղեցիներն են ուշադրության կենտրոնում, և բազմաթիվ հայկական կոթողներ կամ վերածվում են այլ նշանակության շինությունների:

Հղումներ թեմայով.

Թուրք աշակերտները պահանջում են վերականգնել ախոռի վերածված հայկական եկեղեցին. Tert.am

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: