Միջադեպ Բեյրութում. Հայ 2 երիտասարդ վիրավոր է, Թուրքիայի դեսպանատան 2 աշխատակից՝ ձերբակալված

19 մարտի 2015 - 15:34 AMT

PanARMENIAN.Net - Լիբանանի մայրաքաղաք Բեյրութում մարտի 18-ին բախում է տեղի ունեցել հայ երիտասարդների և թուրքական դեսպանատան աշխատակիցների միջև, գրում է «Ազդակ»-ը:

Միջադեպը տեղի է ունեցել, երբ ՀՅԴ երիտասարդների 60 հոգանոց խումբը՝ Լիբանանի երիտասարդական և «Զավարյան» ուսանողական միություններից, հավաքվել են կինոդահլիճի մոտ, որտեղ կայանալու էր Գալիպոլիի ճակատամարտի մասին «Վերջին նամակը» թուրքերեն ֆիլմի ցուցադրությունը. նախաձեռնողը եղել է Թուրքիայի դեսպանատունը:

Հայ երիտասարդներն անգլերենով և արաբերենով պաստառներ, ինչպես նաև Թուրքիայի նախագահ Ռեջեփ Թայիփ Էրդողանին քննադատող լուսանկարներ են պարզել, պատ կազմել դահլիճի մոտ ու թռուցիկներ բաժանել:

Այս քայլը, սակայն, զայրացրել է թուրքական դեսպանատան անվտանգության աշխատակիցներին և թուրք համակիրներին, ու նրանք հարձակվել են խաղաղ ցուցարարների վրա: Հայկական կողմը դիմադրել է, մինչև Լիբանանի ներքին անվտանգության ուժերը միջամտել ու բաժանել են կողմերին:

Դեպքի հետևանքով վիրավորվել է 2 հայ երիտասարդ: Երկու թուրք ձերբակալվել է:

Թուրքական կողմն սկսել է բղավել՝ «Էրդողա՛ն, Էրդողա՛ն», որոնց հայկական կողմը պատասխանել է՝ «ցեղասպա՛ն, ցեղասպա՛ն» բացականչելով: Դաշնակցական ցուցարարները շարունակել են իրենց անգլերեն կանչերը` գոռալով «Հիշո՛ւմ ենք ու պահանջո՛ւմ», «Ոճրագո՛րծ Թուրքիա» և այլ կարգախոսներ, որոնց հաջորդել են հեղափոխական երգերի կատարումները:

Ավելի քան երկու ժամ տևած ակցիայի ընթացքում թուրք դեսպանը փակված է մնացել կինոթատրոնի շենքում՝ սպասելով, որ հայերն ավարտեն ցույցն ու ինքը հեռանալու հնարավորություն ունենա:

Միջադեպի ժամանակ վնասված երիտասարդները դիմել են դատարան:

Հղումներ թեմայով.

Ընդհարումներ` Դաշնակցական Երիտասարդութեան Եւ Թուրքիոյ Դեսպանատան Ապահովական Բաժինի Պաշտօնեաներուն Միջեւ. Ազդակ

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: