Փոխնախարար. Հրաչյա Հարությունյանի արտահանձնումը երկար կտևի՝ բանակցում են

PanARMENIAN.Net - Ռուսաստանում ՃՏՊ արդյունքում 18 մարդու մահվան պատճառ դարձած բեռնատարի վարորդ Հրաչյա Հարությունյանին Հայաստանին արտահանձնելու գործընթացը շարունակվում է, ավարտին հասցնելու համար երկար ժամանակ կպահանջվի: Այդ մասին հայտարարել է ՀՀ արդարադատության փոխնախարար Վիգեն Քոչարյանը, որը Հարությունյանին արտահանձնելու հարցով բանակցությունների մեջ է ռուսական կողմի հետ:

«Աշխատանքները ռուսական կողմի հետ դեռևս ընթանում են: Անհրաժեշտ փաստաթղթերը հայկական կողմն ուղարկել է և այժմ դրանք քննարկման փուլում են»,- ասել է Քոչարյանը, մեջբերում է Panorama.am-ը:

Հունիսի 28-ին ՀՀ գլխավոր դատախազ Գևորգ Կոստանյանը հայտարարել էր, որ իր և ՌԴ գլխավոր դատախազի միջև պայմանավորվածության համաձայն Հարությունյանը պատիժը կկրի Հայաստանում, քանի որ ՀՀ քաղաքացի է:

Փոխնախարարի խոսքով՝ Հարությունյանին Հայաստան վերադարձնելու վերջնական որոշում պետք է կայացնի դատարանը` հարցը քննության առնելուց հետո:

«Հենց այդ հանգամանքը հաշվի առնելով, հարցի շուտափույթ լուծում ակնկալելը ճիշտ չի լինի»,- նշել է Քոչարյանը:

Փոխնախարարը նաև տեղեկացրել է, որ բացի ռուսական կողմի հետ հարցի շուրջ քննարկումներից, նախարարությունը մշտական կապի մեջ է Հարությունյանի հարազատների հետ` անհրաժեշտ իրավական օգնություն են ցուցաբերում:

2013-ին ՀՀ քաղաքացի Հրաչյա Հարությունյանն իր «Կամազ» մակնիշի մեքենայով բախվել էր մարդատար ավտոբուսին, ինչի հետևանքով զոհվել էր 18 մարդ: Հարությունյանը մեղավոր է ճանաչվել երկու հոդվածով՝ ճանապարհային երթևեկության և տրանսպորտային միջոցների շահագործման կանոնները խախտելը, որն առաջացրել է ծանր հետևանքներ և կեղծ փաստաթղթի օգտագործումը: Նա դատապարտվել է 6 տարի 9 ամսվա ազատազրկման: