Լեհաստանի փոխվարչապետ. ՀՀ տարածքով կարող ենք Իրանից ապրանք ներմուծել

PanARMENIAN.Net - Լեհաստանն Իրանից ապրանքներ ներմուծելու համար կարող է օգտվել Հայաստանի տարածքից: Այս մասին հայտարարել է Լեհաստանի փոխվարչապետ, էկոնոմիկայի նախարար Յանուշ Պեխոչինսկին՝ Վարշավայում մամուլի ասուլիսին պատասխանելով հարցին, թե, հաշվի առնելով Ուկրաինայի արևելյան հատվածում ստեղծված ճգնաժամային իրավիճակը, ինչպես է պատրաստվում Լեհաստանն իր ապրանքներն արտահանել Իրան և հակառակը:

«Մետաքսի ճանապարհի ծրագրի իրականացման շրջանակում ծովային և երկաթուղային բեռների փոխադրումը չափազանց հարմար է: Մենք կարող ենք այլընտրանքային ճանապարհից օգտվել, ինչպիսիք են Հայաստանն ու Վրաստանը, հնարավոր է օգտագործել նաև Թուրքիայի տարածքը»,- ասել է նա, մեջբերում է Panorama.am-ը՝ իրանական «ԻՌԻԲ»-ին հղումով:

Հուլիսի 14-ին Իրանում ՀՀ դեսպան Արտաշես Թումանյանն իրանական «Դոնյայե Էղթեսադ» պարբերականին տված հարցազրույցում նշել է, որ Հայաստանի նպատակը Պարսից ծոցը Վրաստանին և սևծովյան տարածաշրջանին կապելն է:

Ըստ նրա, եթե իրանցի ներդրողներն իրենց ապրանքն արտադրեն Հայաստանում, ապա առանց որևէ մաքսային վճարի կկարողանան արտադրված ապրանքն արտահանել ԵԱՏՄ-ի անդամ երկրների մոտ 200 միլիոնանոց շուկա: Բացի այդ՝ ԵԱՏՄ-ի անդամ երկրներից միայն Հայաստանն է, որ GPS+ համակարգի անդամ է, որը հնարավորություն է տալիս որոշ ապրանքատեսակներ ցածր մաքսային վճարներով արտահանել Եվրոպական միություն:

Տարածաշրջանում տնտեսական գործակցության ընդլայնման հնարավորությունների քննարկումներն Իրանի դեմ պատժամիջոցների չեղարկման ֆոնին ակտիվացել են:

Իրանն ու միջազգային միջնորդների «վեցյակը» (ՄԱԿ ԱԽ 5 մշտական ներկայացուցիչն ու Գերմանիան)համաձայնության հասան Իրանի միջուկային ծրագրի շուրջ բանակցություններում: Եվրամիությունը կչեղարկի Իրանի դեմ գործող տնտեսական և ֆինանսական պատժամիջոցները, միաժամանակ Թեհրանը կստանձնի իր պարտավորությունների կատարումը, որոնք համաձայնեցվել են «վեցյակի» հետ, ՄԱԳԱՏԷ-ի հավանությամբ, ասվում է բանակցությունների արդյունքում ընդունված համաձայնագրի նախագծում:

«Եվրամիությունը կկասեցնի բոլոր այն դրույթները, որոնք սահմանափակումներ են ենթադրում Իրանի դեմ, ներառյալ ֆինանսական և տնտեսական պատժամիջոցները, կապված Իրանի միջուկային ծրագրի հետ: Իրանն իր հերթին պարտավորվում է ձեռնամուխ լինել բոլոր պայմանավորվածությունների կատարմանը միջուկային հարցի վերաբերյալ»,-ասվում է փաստաթղթում: Հանվում է նաև ԵՄ օդանավակայաններում Իրանի բեռնատար ինքնաթիռների վայրէջքի արգելքը: Թեհրանն ու «վեցյակը» պայմանավորվել են նաև հանել ԵՄ համար գործող «նավթի, գազի, բենզինի և նավթաքիմիայի» արտահանման բոլոր սահմանափակումները, ինչպես նաև «ածխաջրածինների արդյունահանման համար նախատեսված սարքավորումների» արտահանման մասին: