Հալեպը կրկին հրթիռակոծվել է

PanARMENIAN.Net - Զինյալ ահաբեկչական խմբավորումները դեկտեմբերի 24-ին հրթիռակոծել են Հալեպը: Այս մասին տեղեկացնում է Հալեպի «Գանձասար» թերթի ֆեյսբուքյան էջը:

Հրթառակոծվել են միանգամից մի քանի շրջան՝ Մունշիե, Քոսթաքի Հըմսի, Նեյյել և Ազիզիե: Այլ մանրամասներ դեռևս չկան:

Սեպտեմբերի 21-ին Հալեպի Նոր Գյուղի և Ժապրիեի շրջաններն են հրթիռակոծվել: Սիրիայի զինյալ խմբավորումները տասնյակ հրթիռներ են արձակել նաև Հալեպի Ազիզիե, Նոր Գյուղ, Ժապրիե, Սուլեյման ալ Հալապի հայաշատ բնակավայրերի ուղղությամբ: Ռմբակոծությունների հետևանքով զոհվել ու վիրավորվել են բազմաթիվ մարդիկ։ Վիրավորների թվում նաև հայեր են եղել:

Նոյեմբերի 4-ին սիրիական բանակի մարտիկներն աշխարհազորայինների աջակցությամբ ազատագրել են Սալմիա-Հանասիր ավտոմայրուղին Համա քաղաքից դեպի արևելք: Այդ ավտոմայրուղին «կյանքի ճանապարհ» են անվանում, քանի որ դրանով է իրականացվում Սիրիայի հյուսիսային մայրաքաղաք Հալեպի մատակարարումը: Մինչ այդ այն շրջափակված էր «Իսլամական պետության» և «Ջեբհաթ ան Նուսրա» ահաբեկչական խմբավորումների կողմից: Ինչպես հայտնել է «Ալ Վաթան» թերթը, ազատագրվել է ավտոմայրուղուց 15 կմ խորությամբ տարածք: Ներքին հակամարտությունից առաջ Սիրիայում բնակվում էր ավելի քան 100.000 հայ, որոնց մեծ մասն ապրում էր երկրի հյուսիսում` Հալեպ գավառում և հյուսիս–արևելքում` էլ–Խասակե գավառում։ Դամասկոսում բնակվում էր մոտ 7.000 հայ։