ԱՄՆ փոխնախագահը ՀՀ և Ադրբեջանի նախագահներին կոչ է արել դադարեցնել մարտական գործողությունները

PanARMENIAN.Net - ​ԱՄՆ փոխնախագահ Ջո Բայդենը տեղեկացրել է, որ Հայաստանի և Ադրբեջանի նախագահների հետ քննարկել է մարտական գործողությունների դադարեցման հարցը: Այդ մասին նա գրել էTwitter-ի իր միկրոբլոգում:

«Ինչպես ասացի նախագահներ Սարգսյանին և Ալիևին, Լեռնային Ղարաբաղի հակամարտության ամբողջական կարգավորումն անչափ կարևոր է իրենց կայունության, անվտանգության և զարգացման համար»,- նշել է նա:

Ապրիլի 3-ին ԱՄՆ պետքարտուղար Ջոն Քերրին դատապարտել էր ղարաբաղյան հակամարտության գոտու շփման գծում հրադադարի լայնածավալ խախտումը: Նա կոչ էր արել կողմերին խուսափել ապագա սրացումից, խստորեն հետևել հրադադարի ռեժիմին: Քերին նշել էր, որ «տարածաշրջանում անկայունությունը ցուցադրում է, ինչու կողմերը պիտի սկսեն անհապաղ բանակցություններ վարել Մինսկի խմբի հովանու ներքո` հակամարտության համապարփակ կարգավորման հասնելու համար»:

Քերին նշել է, որ հակամարտությունը չունի ռազմական լուծում և որպես համանախագահ երկիր, ԱՄՆ-ն աշխատում է կողմերի հետ` հասնելու վերջնական խաղաղության:

Ապրիլի լույս 2-ի գիշերից ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 3 անօդաչու թռչող սարք (ԱԹՍ), 29 տանկ ու 5 զրահամեքենա: Ադրբեջանն ընդունել է 15 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում մի քանի տասնյակ դիակներ կան, 1 ուղղաթիռ և 1 ԱԹՍ:

Հայկական կողմից զոհվել է 20 զինծառայող, 26-ն անհետ կորել, մոտ 72-ը վիրավոր է: Հայկական կողմը նաև կորցրել է մեկ տանկ: Բացի առաջնագծում ընթացող մարտերից, հակառակորդը հրթիռահրետանային հարվածներ է հասցրել խաղաղ բնակավայրերին: Մարտունիում դպրոցի հրետակոծման հետևանքով զոհվել է 12-ամյա երեխա, 3 տարեց մարդ դաժանաբար սպանվել Թալիշ գյուղում: Եվս 6 քացաքացիական, որոնցից երկուսը երեխա էին, վիրավորվել են: