Լիճքվազի հանքի ոսկու պաշարը՝ 18.7 տոննա

29 ապրիլի 2016 - 14:47 AMT

PanARMENIAN.Net - Ռուս գործարարներ Ալեքսանդր Նեսիսին, Ալեքսանդր Մամուտին և չեխ Պետր Քելներին պատկանող Polymetal International կազմակերպությունը հայտնել է Սյունիքի մարզի Մեղրիի շրջանում գտնվող Լիճքվազ բազմամետաղ հանքավայրում հանքային պաշարների աուդիտի բարեհաջող ավարտի մասին:

Հաղորդագրությունում ասվում է, որ անցկացված աուդիտի արդյունքներով` օգտակար հանածոների ծավալը հանքավայրում կազմում է 600 հազար ունցիա (18.7 տոննա) ոսկու էկվիվալենտ, որը արդյունահանվելու է փակ` ստորգետնյա ճանապարհով:

Ապրիլի 29-ի դրությամբ, ոսկու 1 տռոյական ունցիան արժե $1277:

Լիճքվազ հանքավայրը պարունակում է 4.3 մլն տոննա հանքանյութ` 4.2 գրամ/տոննա միջին պարունակությամբ: Հանքային պաշարները գնահատվել են CSA Global անկախ աուդիտորական ընկերության կողմից:

Ընկերությունը 2016-ին նախապատրաստում է Լիճքվազում իրականացնել հավելյալ զգալի ծավալով հորատումներ, որպեսզի 2017-ի երրորդ քառորդում գնահատվեն հանքային պաշարներն ըստ JORC չափորոշիչների և նախապատրաստվեն Կապանի և Լիճքվազի կոմբինացված շահագործման նախագծերը: Polymetal-ը մտադիր է հանքանյութերը տեղափոխել Կապանի հարստացման ֆաբրիկա, որի գնման գործարքը կայացել է 2016-ի ապրիլի 28-ին:

Ռուսական Polymetal PLC ընկերությունը մարտի 2-ին հայտարարել է Կապանի ոսկու հանքը գնելու վերաբերյալ կանադական Dundee Precious Metals Inc-ի հետ գործարք կնքելու մասին: Ինչպես հայտնում է Alliance News-ը, Polymetal-ը $25 մլն կվճարի գործարքի համար, որից $10 միլիոնը` դրամական միջոցներով և 15 միլիոնը դոլար` ընկերության նոր բաժնետոմսերով: Գործարքը նախատեսվում է ավարտին հասցնել 2016-ի երկրորդ եռամսյակում:

Dundee Precious Metals Inc-ն 2015-ին վաճառել է հանքից ստացված 21,000 տրոյական ունցիա ոսկի, 1,000 տոննա պղինձ, 5000 տոննա ցինկ և 0.4 տոննա արծաթ: EBITDA ցուցանիշը (շահույթը մինչև հարկումն ու ամորտիզացիան) կազմել է $35 մլն, շահույթը՝ $5 մլն:

Հղումներ թեմայով.

London South East. Polymetal Details Mineral Resource Estimate For Lichkvaz

Polymetal to Buy Kapan Gold Mine in Armenia for $25 Mln