Հարությունյան. Պետմարմինների թիվը, հնարավոր է՝ կրճատվի

PanARMENIAN.Net - Պետական մարմինների քանակը օպտիմալացման ծրագրի շրջանակում հավանաբար կկրճատվի: Այս մասին լրագրողներին ասել է ՀՀ կառավարության աշխատակազմի-ղեկավար նախարար Դավիթ Հարությունյանը:

«Կարևոր հարցադրումը հետևյալն է՝ պետական մարմինների լիազորությունների վերանայում, հավանաբար, պետական մարմինների քանակի կրճատում, ինչը չի նշանակում՝ աշխատակիցների կրճատում»,-ասել է նա, մեջբերում է Tert.am-ը:

Ճշտող հարցին՝ առաջիկայում գերատեսչություններ կմիավորվե՞ն, Հարությունյանը հստակեցրել է. «Այո, բայց խնդիրը խոշորացումը չէ: Կարելի է խոշորացնել, բաժանել, բայց էական բան չփոխել: Ամենակարևոր հարցը լիազորումն է, կառավարության գործունեության բեռնաթափումը, ինչի վրա մենք աշխատում ենք»:

«Մենք մեր համակարգով բավարարված չենք, կարծում ենք, որ պետական ապարատը պետք է նոր խնդիրներ իր ուսերի վրա վերցնի՝ առանց մեծացնելու պետական ապարատը», հավելել է աշխատակազմի-ղեկավար նախարարը:

Հունիսի 1-ից ոստիկանության համակարգում կրճատումների նոր փուլ է սկսվելու: Այդ մասին է հայտարարել ՀՀ ոստիկանապետի տեղակալ Վարդան Եղիազարյանը Ազգային ժողովում 2015 թվականի բյուջեի կատարողականի հաշվետվության քննարկման ժամանակ:

ՀՀ վարչապետ Հովիկ Աբրահամյանը կառավարության մայիսի 12-ի նիստում հայտարարել է, որ ՀՀ-ում պետք է ձևավորվի առավել քիչ ծախսատար պետական կառավարման ապարատ: Նա խոսել է դրան հասնելու 3 ուղղության մասին: Դրանք են կոռուպցիայի դեմ պայքարն, ավելորդ ծախսերի ու ուռճացված պետական ապարատի կրճատումը:

Կարդացեք նաև՝ Կառավարությունը մոտ 800 ծառայողական մեքենա կկրճատի