Ֆրանսիացի պատգամավորը պահանջել է չեղարկել Շենգենի գոտին

PanARMENIAN.Net - Ֆրանսիայի «Ազգային ճակատի» առաջնորդ Մարին լը Պենը պահանջել է չեղարկել Շենգենի գոտին: Ըստ նրա, կուսակցությունը պահանջում է «անվտանգության ապահովման համար անհապաղ չեղարկել Շենգենը»: Բացի այդ, նա քննադատել է Եվրամիության քաղաքականությունն ընդհանուր առմամբ և հայտարարել է, որ եթե նախագահ լիներ, ապա վեց ամսում հանրաքվե կնախաձեռներ ԵՄ կազմից դուրս գալու վերաբերյալ:

Լը Պենը նաև բողոքել է, որ այդ հարցի շուրջ չկա կառուցողական երկխոսություն գործող նախագահ Ֆրանսուա Օլանդի կողմից:

«Ազգային ճակատի» առաջնորդն արդեն բազմիցս է հայտարարել, որ մտադիր է մասնակցել 2017-ի նախագահական ընտրություններին: Նա հայտնի է որպես ԵՄ-ից Ֆրանսիայի դուրս գալու հետևողական կողմնակից:

Մասնավորապես հունիսի 17-ին նա նշել էր, որ ֆրանսիացիները, հավանաբար, հազար անգամ ավելի շատ պատճառներ ունեն անջատվելու, քան բրիտանացիները: Նա կարծում է, որ դաշինքի բոլոր անդամները պետք է մտածեն ԵՄ հետ հարաբերությունները վերանայելու մասին:

Հունիսի 23-ին Մեծ Բրիտանիայում հանրաքվե տեղի ունեցավ ԵՄ-ում երկրի հետագա անդամակցության վերաբերյալ: Brexit-ի, այսինքն ԵՄ կազմից դուրս գալու, կողմնակիցները հաղթել են ձայների 51.9 %-ով: Մասնակցությունը գերազանցել է 72 տոկոսը: Ընդհանուր առմամբ քվեարկությանը մասնակցել է ավելի քան 33,5 մլն մարդ: