«Սասնա ծռերից» Սեդրակ Նազարյանի վիճակը կայուն ծանր է

PanARMENIAN.Net - Հուլիսի 31-ին, ժամը 9.30-ի սահմաններում ոստիկանության ՊՊԾ գնդի տարածքից հրազենային վնասվածքով «Էրեբունի» հիվանդանոց տեղափոխված «Սասնա ծռեր» խմբի անդամ Սեդրակ Նազարյանը, որը վիրահատության էր ենթարկվել, կայուն ծանր վիճակում է:

«Կրծքավանդակի առաջնային պատի թափանցող վնասվածքով զինյալ խմբի անդամը վերակենդանացման բաժանմունքում է, վիճակը գնահատվում է կայուն ծանր»,- հայտնել է առողջապահության նախարարի մամուլի խոսնակ Անահիտ Հայթայանը, գրում է Tert.am-ը:

Առողջապահության նախարարի խոսնակը նաև ասաց, որ ծանր է ոստիկանության ՊՊԾ գնդի գրավման արդյունքում հուլիսի 17-ին կրծքային-որովայնային հրազենային վիրավորում ստացած ոստիկանի վիճակը։ «Հերացի» թիվ 1 համալսարանական համալիրի վերակենդանացման բաժանմունքում գտնվող ոստիկանի մոտ վիրավորումից վնասվել են լյարդը, բարակ և հաստ աղիները, ստոծանին, ինչպես նաև թոքերը։ Կլինիկայի մասնագետները փուլ առ փուլ պայքարում են հիվանդի վիճակը բարելավելու համար։

Ոստիկանը օգոստոսի 1-ին երրորդ անգամ վիրահատվել է։

15 օր շարունակ Հայաստանի ոստիկանության պարեկապահակային ծառայության գնդի տարածքը գրաված պահելուց հետո, հուլիսի 31-ին զինված խմբի անդամները վայր դրեցին զենքն ու հանձնվեցին իշխանություններին, խմբի 20 անդամը ձերբակալվեցին:

Պարեկապահակային ծառայության գնդի տարածքը գրավելու գործով 47 ձերբակալված և կալանավորված կա։