Իսրայելը $ 20 մլն կվճարի 2010-ին թուրքական նավում սպանվածների ընտանիքներին

17 օգոստոսի 2016 - 16:07 AMT

PanARMENIAN.Net - Թուրքիայի արդարադատության նախարար Բեքիր Բոզդաղը հայտնել է, որ Թուրքիայի և Իսրայելի հարաբերությունների կարգավորման վերաբերյալ պայմանագրի նախագիծը ներկայացվել է Թուրքիայի ազգային մեծ ժողովի հաստատմանը, հայտնում է Tert.am-ը թուրքական իշխանամետ «Յենի Շաֆաք» թերթի վրա հղումով:

Հունիսի 28-ին Թուրքիան ու Իսրայելը համաձայնագիր են կնքել հարաբերությունները կարգավորելու մասին: Իսրայելն ընդունել է հարաբերությունների վերականգնման համար Թուրքիայի պայմանները:

Ըստ համաձայնագրի՝ Իսրայելը պարտավորվում է 20 միլիոն դոլար գումար վճարել թուրքական «Ազատության տորմիղ» (Mavi Marmara) նավում սպանված մարդկանց ընտանիքներին: Փոխհատուցումը պետք է արվի համաձայնագրի ուժի մեջ մտնելուց հետո՝ 25 օրվա ընթացքում:

Ավելի վաղ Թուրքիայի վարչապետ Բինալի Յըլդըրըմը հայտարարել էր, որ Իսրայելը համաձայնել է Թուրքիայի առաջադրած բոլոր պայմաններին:

Երկրները նախկինում համարվել են ռազմավարական գործընկերներ, սակայն հեռացան, երբ Թուրքիայի արտաքին քաղաքականությունը եվրոպական ինտեգրումից շեղվեց դեպի արաբամահմեդական աշխարհ: Փոխադարձ սառեցման գագաթնակետը «Ազատության տորմիղի» հետ կապված միջադեպն էր, երբ 2010-ին իսրայելցիները կասեցրին Գազայի հատված ուղևորվող թուրքական նավերի առաջխաղացումը` սպանվեց 9 թուրք:

Այս միջադեպից հետո պաշտոնական Անկարան դիվանագիտական հարաբերությունները հասցրել էր նվազագույնի և սառեցրել ռազմական և առևտրային ոլորտում կնքված պայմանագրերը:

2015-ի վերջում ԶԼՄ-ները հայտնեցին, որ երկրները հարաբերությունների կարգավորման նախագիծ են պատրաստել, որը ներառում է դեսպանների վերադարձը և իսրայելյան բնական գազի առաքումը նախատեսող կետեր` բավարարելու համար ներքին պահանջարկն ու տարանցումը եվրոպական շուկա:

Հղումներ թեմայով.

Tert.am. Իսրայելը 20 մլն դոլար փոխհատուցում կվճարի թուրքական «Մավի Մարմարա» նավում սպանված մարդկանց ընտանիքներին

Gazeta.ru: Израиль выплатит Турции $20 млн за инцидент с «Флотилией свободы» в 2010 году

JPost. Turkish parliament to debate Israeli $20 million flotilla payment