Շտայնմայեր. Սիրիան առնվազն 3-7 օրով թռիչքներից զերծ գոտի պետք է հայտարարվի

22 սեպտեմբերի 2016 - 13:42 AMT

PanARMENIAN.Net - Գերմանիայի ԱԳ նախարար Ֆրանկ Վալտեր Շտայնմայերը կոչ է արել թռիչքներից զերծ գոտի հայտարարել Սիրիան 3-7 օրով: Այդ մասին ասվում է նրա հայտարարության մեջ:

«Իրավիճակը Սիրիայում ռիսկային է: Եթե հրադադարի էլի ինչ-որ շանս կա, ապա միայն որոշակի ժամկետով` առնվազն 3, կամ 7 օրով թռիչները Սիրիայի երկնքում ամբողջապես արգելելով»,-ասել է նա:

Ըստ նրա, «դա պայմաններ կստեղծի միջազգային պայմանավորվածությունների կատարման համար» և թույլ կտա «կողմերին վերադառնալ բանակցությունների սեղանի մոտ` քննարկելով Սիրիայում անցումային կառավարության ստեղծումը»:

Նա հավելել է, որ եթե առաջարկն ընդունվի, «ՄԱԿ-ը կկարողանա վերսկսել հումանիտար բեռների առաքումը կարիքավորներին», հայտնում է ՏԱՍՍ-ը:

Սեպտեմբերի 19-ին Բաշար Ասադի ուժերը հայտարարեցին հրադադարի շուրջ համաձայնությունից դուրս գալու մասին, որից մի քանի ժամ անց ընդդիմության կողմից գրավված Հալեպի թաղամասերը ռմբակոծվեցին: ՌԴ ներկայացուցիչները հայտարարեցին, որ ԱՄՆ և նրանց կոալիցիայի կողմից Սիրիայի կառավարական ուժերի ռմբակոծումը սեպտեմբերի 17-ին հարվածի տակ դրեց հրադադարի մասին համաձայնությունը:

Հրադադարը Սիրիայում հաստատվել էր սեպտեմբերի 12-ի մայրամուտին, երբ մեկնարկեց մահմեդական Ղուրբան Բայրամ տոնը: Հրադադարը սահմանվել է ըստ ԱՄՆ և ՌԴ պայմանավորվածության և տևելու 10 օր, որին պետք է հաջորդեն երկու երկրների օդային գործողությունները ջիհադական խմբավորումների դեմ:

Հղումներ թեմայով.

ТАСС: Штайнмайер призвал ввести бесполетную зону над Сирией на 3-7 дней