Թուրքիայում ձերբակալված քրդամետ պատգամավորներից մեկն ազատ է արձակվել

PanARMENIAN.Net - Թուրքիայի ոստիկանությունն ազատ է արձակել քրդամետ Ժողովրդների դեմոկրատական կուսակցությունից խորհրդարանի պատգամավոր Զիա Փիրին դատախազությունում ցուցմունքների գրանցումից հետո:

Դատախազությունը ցուցմունքներ է վերցրել նաև կուսակցության համանախագահ Սելահադդին Դեմիրթաշից և նրան կալանավորելու հարցում է ներկայացրել դատարան, հայտնում է «Թրեդն» գործակալությունը թուրքական Hurriyet-ի վրա հղումով:

Նոյեմբերի լույս 4 գիշերը Թուրքիայում ձերբակալվել է քրդամետ կուսակցության 16 անդամ, այդ թվում կուսակցության համանախագահներ Սելահադդին Դեմիրթաշն ու Ֆիգեն Յուկսեդաղը: Ձերբակալությունները տեղի են ունեցել միաժամանակ Թուրքիայի մի քանի քաղաքներում, մասնավորապես, Անկարայում, Դիարբեքիրում, Մարդինում:

Պատգամավորները ձերբակալվել են այն պատճառաբանությամբ, որ չեն ներկայացել դատարան ցուցմունքներ տալու համար:

Ավելի վաղ հայտնի դարձավ, որ Դիարբեքիրի հանրապետական դատախազությունը Թուրքիայի քրդամետ «Ժողովուրդների դեմոկրատական կուսակցության» (HDP-ԺԴԿ) համանախագահ Սելահեթթին Դեմիրթաշի նկատմամբ հետաքննություն է սկսել:

Հետաքննությունը Դեմիրթաշին որպես կասկածյալ է ներգրավել «Ժողովրդին օրենքներին չենթարկվելու կոչ անելու, Թուրքիայի Հանրապետության դատական օրգանները անարգելու, նախագահին վիրավորելու, հանցանքն ու հանցավորին գովաբանելու» մեղադրանքով:

Հոկտեմբերի 27-ին ունեցած բողոքի ցույցի ժամանակ Դեմիրթաշը ելույթում մասնավորապես ասել է. «Կատարվածը չենք ընդունելու որպես սովորական իրադարձություն: Մինչ այժմ միշտ վաղաժամ ընտրություններ ենք տեսել: Սրանից հետո վաղաժամ ընտրություններ չեն լինելու. Պայքարելու ենք մինչև քաղաքապետարանները վերադարձնեն մեզ: 81 նահանգում (Թուրքիայի-խմբ.) փողոց են դուրս գալու մեր բոլոր ընկերները: Հետքայլ չի լինելու»: