ԲՀԿ քաղխորհուրդը Ծառուկյանին խնդրում է քաղաքականություն վերադառնալ

PanARMENIAN.Net - ԲՀԿ քաղաքական խորհուրդը դիմել է ԲՀԿ հիմնադիր նախագահ Գագիկ Ծառուկյանին՝ քննարկելու ակտիվ քաղաքականություն վերադառնալու և «մեծ համախմբմամբ, միասնական ջանքով ու ժողովրդի աջակցությամբ» երկրի առջև ծառացած խնդիրները լուծելու հարցը: Այս մասին հայտնի է դարձել դեկտեմբերի 3-ին տեղի ունեցած ԲՀԿ քաղաքական խորհրդի ընդլայնված նիստի արդյունքում, որը քննարկել է Ծառուկյանի՝ ակտիվ քաղաքականություն վերադառնալու հարցն ու ընդունել հայտարարություն։

Ընդունված հայտարարության տեքստում, մասնավորապես, նշվում է.

«ԲՀԿ քաղաքական խորհուրդը, հաշվի առնելով հանրապետության բոլոր համայնքներում և Երևանում տասնյակ հազարավոր մեր հայրենակիցների պահանջն ու ցանկությունը, հաշվի առնելով մեր երկրում հանրային-քաղաքական մեծ համախմբում ապահովելու անհրաժեշտությունը, որը ի զորու է իրականացնել ժողովրդի անվերապահ աջակցությունն ու վստահությունը վայելող գործիչ Գագիկ Ծառուկյանը, հաշվի առնելով երկրի ներքին և արտաքին լրջագույն մարտահրավերները բացառապես մեծ համախմբմամբ լուծելու հրամայականը, հաշվի առնելով, որ Ծառուկյանի ակտիվ քաղաքականությունից հեռանալով որևէ այլ գործիչ և քաղաքական ուժ ի զորու չեղավ լուծելու այդքան անհրաժեշտ հասարակական-քաղաքական համախմբման խնդիրը,ԲՀԿ քաղաքական խորհուրդը, մեր տասնյակ հազարավոր քաղաքացիների անունից, դիմում է ԲՀԿ հիմնադիր նախագահ Գագիկ Ծառուկյանին՝ քննարկելու ակտիվ քաղաքականություն վերադառնալու և մեծ համախմբմամբ, միասնական ջանքով ու ժողովրդի աջակցությամբ մեր երկրի առջեւ ծառացած խնդիրները լուծելու հարցը»։

2015 թվականի մարտի 5-ին կուսակցության արտահերթ համագումարին հնչեցրած իր ելույթում Գագիկ Ծառուկյանը հայտարարել էր. «Այսօր եկել է այն պահը, երբ ես որոշում եմ կայացրել՝ այլևս չզբաղվել ակտիվ քաղաքականությամբ, վայր դնել կուսակցության նախագահի և խմբակցության ղեկավարի լիազորությունները»։

Իսկ դեպքերի ինչ հաջորդականությունն էր ստիպել Գագիկ Ծառուկյանին հեռանալ քաղաքականությունից, կարդացեք այստեղ՝Գագիկ Ծառուկյան vs Սերժ Սարգսյան. Փետրվարյան իրադարձությունների ժամանակագրություն