Վարչապետ. Սոցապահովության ոլորտում անհրաժեշտ են բարեփոխումներ պետական ծրագրերի ամբողջ սպեկտրով

PanARMENIAN.Net - Սոցիալական ապահովության ոլորտում անհրաժեշտ են բարեփոխումներ պետական ծրագրերի ամբողջ սպեկտրով: Այդ մասին կառավարության դեկտեմբերի 29-ի նիստում հայտարարել է վարչապետ Կարեն Կարապետյանը՝ անդրադառնալով սոցիալական ոլորտում կոռուպցիոն սխեմայի բացահայտմանը, հայտնում է Panoarama-am-ը:

Կառավարության ղեկավարն ընդգծել է, որ պետք է ստեղծել համակարգեր կոռուպցիան բացառելու համար:

«Անհրաժեշտ է բարձրացնել ծրագրերի թե հասցեականությունը, թե դրանց արդյունավետությունը»,-ասել է նա: Վարչապետի խոսքով, պետությունը պետք է ձեռք մեկնի կարիքավորին, նրան ոտքի կանգնելու նեցուկ լինի, սակայն չստեղծի չաշխատելու խթաններ:

«Սոցիալական պետական ծրագրերը պետք է այնպես մշակվեն, որ օգնությունը երբեք չբերի չարաշահումների ու կոռուպցիոն դրսևորումների, առաջին հերթին հասնի ամենակարիքավորներին, չաղավաղվի սոցիալական արդարությունը»,-ասել է կառավարության ղեկավարը:

Ավելի վաղ ԱԱԾ-ն հայտարարել էր, որ ՀՀ բժշկասոցիալական փորձաքննության գործակալությունում ձևավորվել և տևական ժամանակ գործել է կոռուպցիոն սխեմա, որի միջոցով պաշտոնատար անձինք ստացել են կաշառքներ և դրանք փոխանցել իրենց վերադասներին:

Կաշառք ստանալու կասկածանքով ձերբակալվել են, ապա կալանավորվել ՀՀ Աշխատանքի և սոցիալական հարցերի նախարարության աշխատակազմի ՀՀ բժշկասոցիալական փորձաքննության գործակալության պետ Արմեն Սողոյանը և նույն գործակալության վերափորձաքննության բաժնի պետ Ա.Պետրոսյանը: