«Գազպրոմ Արմենիա». Վրաց-ռուսական գազային պայմանագրի ժամկետի ավարտը ՀՀ-ին մատակարարումների վրա չի ազդի

PanARMENIAN.Net - Վրաստանի և «Գազպրոմ-էքսպորտի» միջև նոր համաձայնագրի հարցով բանակցությունները ընթացքի մեջ են: Այս մասին PanARMENIAN.Net ին հայտնեց «Գազպրոմ Արմենիա» փակ բաժնետիրական ընկերության մամուլի խոսնակ Շուշան Սարդարյանը:

2016-ի դեկտեմբերի 31-ին սպառվել է Վրաստանի և «Գազպրոմ-էքսպորտի» միջև կնքված պայմանագրի ժամկետը, սակայն կողմերը մինչ օրս նոր պայմանների մասին համաձայնության չեն եկել:Գերատեսչությունում նշել են, որ պայմանագրի ժամկետը, որը ներառում էր ինչպես գազի գնումը, այնպես էլ տարանցումը դեպի Հայաստան, սպառվել է:

«Պայմանագրի ժամկետի սպառումը չի ազդում դեպի Հայաստան մատակարարումների վրա: Համաձայնագիրը գնի հետ է կապված, մատակարարումների հետ կապ չունի», - ասաց Սարդարյանը:

Վրաստանի էներգետիկայի փոխնախարար Մարիամ Վալիշվիլիի խոսքով, վրացական կողմը վերջին հանդիպումից վերադարձել է չհամաձայնեցված դիրքորոշմամբ: Վերջին հանդիպումը կողմերի միջև տեղի է ուինեցել դեկտեմբերի 23-ին:

Նա նշել է, որ բնական գազի տարանցումն այժմ իրականացվում է սովորական ռեժիմով, սակայն վրացական կողմը նոր պայմաններում ցանկանում է առավելագույն արդյունքի հասնել: Ըստ Վալիշվիլիի, առավելագույն արդյունքը, հավանաբար, կլինի տարանցման համար վճարման ֆինանսական մոդելին անցնելը, սակայն ընդունելի պայմաններով, կամ վերադարձը 2016-ին գործող պայմանագրին:

Վրաստանը տարեկան մոտ 2,5 մլրդ խմ գազ է սպառում: Հիմնական ծավալը ներմուծվում է Ադրբեջանից: 2015-16 թվականներին կրկին տևական բանակցություններ էին ընթանում Վրաստանի և «Գազպրոմի» միջև, սակայն արդյունքում Թբիլիսին հասավ իր ուզածին և պահպանեց վճարման գործող կարգը` ստանալով ՀՀ առաքվող ռուսական գազի 10 տոկոսը:

Վրաստանը «Շախդենիզ» հանքավայրից ստանում է տարեկան 750-800 մլն խմ գազ, 1,4 մլն խմ` SOCAR-ից և ևս 200 մլն խմ` Ռուսաստանից:Այդպիսով` Վրաստանը սպառվող գազի 88% ստանում է Ադրբեջանից, իսկ 12%-ը` Ռուսաստանից:Ռուսական գազը Վրաստանը ստանում է որպես վարձ իր տարածքով դեպի Հայաստան գազի առաքման համար: