Հնչակյանները դադարեցնում են Ծառուկյանի դաշինքի հետ քննարկումները

PanARMENIAN.Net - Սոցիալ դեմոկրատ հնչակյան կուսակցությունը դադարեցնում է ԲՀԿ նախագահ Գագիկ Ծառուկյանի դաշինքի հետ քննարկումները:

Հիմնավորման մեջ ասված է, որ 2016-ի դեկտեմբերի վերջից Ծառուկյանի լիազոր անձանց նախաձեռնությամբ սկսվել են բանակցություններ Սոցիալ դեմոկրատ հնչակյան կուսակցության հետ, որի հիմքում ընկած էր հետևյալը։

1. Առաջիկա նախատեսվող դաշինքում քննարկվում է մեծ քաղաքական պլատֆորմի ստեղծում, որի հիմքում ընկած է քաղաքական առողջ համագործակցության, սոցիալական արդարության հաստատման, երկրում որակական փոփոխություններ կատարելու գաղափարները։

2. ՍԴՀԿ-ն համաձայնվել էր միանալ այդ պլատֆորմին, որտեղ դաշինք կազմող ուժերը պետք է լինեին ՍԴՀԿ-ն, ԲՀԿ-ն, ՌԱԿ֊ը, ՀՀՇ-ն և Միասնություն շարժումը։

3. Քաղաքական կոնսուլտացիաները ընթացել են բոլոր մակարդակներով` ընդհուպ մինչև Ծառուկյանի հետ, որի հետ անձամբ ձեռք է բերվել քաղաքական պայմանավորվածություն բոլոր հնարավոր հարցերով։

4. ՍԴՀԿ-ն մասնակցելու էր 8 ռեյտինգային թեկնածուով` այդ թվում բացառապես սեփական միջոցներով։

5. ՍԴՀԿ համաշխարհային ղեկավարությունն այս պայմաններով պատրաստ է եղել բարոյական աջակցություն ցուցաբերել դաշինքին։

Մի քանի օր է, սակայն, բոլոր հնարավոր առումներով միակողմանիորեն խախտվում են քաղաքական պայմանավորվածությունները, որի պատճառով Հնչակյան կուսակցությունը դադարեցնում է Գագիկ Ծառուկյանի գլխավորած միավորման հետ քննարկումները։

ԲՀԿ-ն ընտրություններին կմասնակցի «Ծառուկյան դաշինք» անունով, իսկ դաշինքի շտաբի պետը կլինի Վերահսկիչ պալատի նախագահ Իշխան Զաքարյանը:

Կարդացեք նաև՝ Իշխանությունից՝ ընդդիմություն, և հակառակը. «Բարգավաճ Հայաստանի» անցած ուղին