Թրքամետ հաքերներն աքաունթներ են կոտրել Twitter-ում և տեղադրել Էրդողանի տեսագրությունը

15 մարտի 2017 - 17:25 AMT

PanARMENIAN.Net - Հաքերների խումբը, որը հայտարարել է Թուրքիայի իշխանություններին սատարելու մասին, բազում աքաունթներ է կոտրել Twitter-ում, այդ թվում Amnesty International-ի, ԱՄՆ-ում UNICEF-ի և Համաշխարհային օդերևութաբանական կազմակերպության էջերը:

Հաղորդագրություններում նացիստական խաչեր ու «նացիստական Գերմանիա» և «նացիստական Նիդերլանդներ» հեշթեգեր, ինչպես նաև տեսագրություններ են տեղադրվել Թուրքիայի նախագահ Ռեջեփ Թայիփ Էրդողանի ելույթներից հատվածներով: Բացի այդ, հիշատակվում է նաև ապրիլի 16-ը, երբ Թուրքիայում կայանալու է սահմանադրական հանրաքվեն, հայտնում է ՌԻԱ Նովոստին:

ԶԼՄ-ները հայտնում են, որ կիբերհարձակում է կատարվել նաև Մեծ Բրիտանիայի առողջապահության նախարարության, Եվրախորհրդարանի, գերմանական Borussia Dortmund ֆուտբոլային ակումբի, Չիկագոյի համալսրաանի էջերի վրա: Կայքերի մեծ մասն արդեն վերականգնել է աշխատանքը:

Հաքերային խմբերից ոչ մեկը չի ստանձնել գրոհի պատասխանատվությունը:

Թուրքիայի և Նիդերլանդների միջև քաղաքական ճգնաժամի խորացման ֆոնին Անկարան հայտարարել է, որ խզում է դիվանագիտական կապերն այդ երկրի իշխանությունների հետ:Իրավիճակի սրման համար առիթ էր հանդիսացել Նիդերլանդների վարչապետ Մարկ Ռյուտեի կողմից թուրք նախարարների քարոզարշավի կազմակերպման արգելքը Ռոտերդամում:Ավելի վաղ ԵՄ-ն հորդորել է Թուրքիային ձեռնպահ մնալ «ավելորդ հայտարարություններից» և գործողություններից Նիդերլանդների հետ կապված սկանդալի ֆոնին:

Ավելի վաղ բելգիական Անտվերպենի նահանգապետ Բարտ դե Վեյվերն արգելել է մարտի 17-ին կայանալիք թուրքերի հանրահավաքն այդ մեծության երկրորդ քաղաքի արվարձանում՝ Բերկեմում:

Հղումներ թեմայով.

The Guardian. Twitter accounts tweet swastikas and pro-Erdoğan support in massive hack

Ria.ru: Хакеры разместили свастику в Twitter-аккаунте Amnesty International