Ֆրանսիայում անհայտները կրակել են մզկիթից դուրս եկողների ուղղությամբ

PanARMENIAN.Net - Ֆրանսիայում դիմակավորված անհայտ անձինք կրակ են բացել Ավինյոն քաղաքի մզկիթի մոտ։ Այս մասին La Provence-ին հղումով հաղորդում է ՌԻԱ Նովոստի գործակալությունը։

Նշվում է, որ հարձակվողներն երկուսն են՝ զինված ատրճանակով և ինքնաձիգով: Նրանք դուրս են եկել մեքենայից և սկսել կրակել մզկիթից դուրս եկող մարդկանց ուղղությամբ։ Միջադեպի հետևանքով տուժել է առնվազն 8 մարդ, որոնց թվում է նաև 7-ամյա երեխա։ Հարձակվողներին հաջողվել է հեռանալ դեպքի վայրից։

Ոստիկանությունը հերքում է ահաբեկչության տարբերակը։ Ըստ նրանց, միջադեպը տեղի է ունեցել երիտասարդների միջև տեղի ունեցած վիճաբանության հետևանքով։

Ավելի վաղ Ֆրանսիայի ոստիկանությունը ձերբակալել էր մի տղամարդու, որը հունիսի 29-ին փորձել է մեքենայով վրաերթի ենթարկել Փարիզի արվարձան Կրետեյի մզկիթի շրջակայքում հավաքված մարդկանց: Շրջանառվող, սակայն չհաստատված տեղեկությունների համաձայն, հարձակվողն ազգությամբ հայ էր, ով ուզում էր վրեժ լուծել իսլամիստական հարձակումների համար: