Մարզիչ. Բասկետբոլի աղջիկների հավաքականը 2018-ին հանդես կգա ԵԱ B դիվիզիոնում

12 հուլիսի 2017 - 10:58 AMT

PanARMENIAN.Net - 2017-ի բասկետբոլի Մ 18 տարեկան աղջիկների Եվրոպայի C դիվիզիոնի առաջնությունում Հայաստանի հավաքականը երկրորդն էր: Մեր թիմը զիջել է միայն հիմնական մրցակից Կիպրոսին: Հավաքականի ավագ մարզիչ Վահագն Հարությունյանի խոսքով պարտության պատճառը հոգեբանական էր, քանի որ բացակայում էին թիմի առաջատարներից մի քանիսը:

Մարզիչը տեղեկացրել է, որ նախատեսում են հանդես գալ B դիվիզիոնում:

«Հաջորդ տարի նախատեսում ենք հանդես գալ B դիվիզիոնում, սակայն դեռեւս որոշված չէ Մ 18, թե Մ 20 տարիքային խմբում: C դիվիզիոնում այլեւս անելիք չունենք»,- նշել է Հարությունյանը:

«Ես վստահ էի, որ Մալթա մեկնում ենք չեմպիոնության համար: Բայց, բացման արարողությունից սկսած մեր բասկետբոլիստների մոտ հոգեբանական լարվարծություն կար: Մրցակիցները կանգնած էին 11-12 բասկետբոլիստով, իսկ մենք` 7: Ինչպես հայտնի է, թիմի կազմում բացակայում էին մեր առաջին համար Վիկտորյա Տոնոյանը եւ առանցքային խաղացողներ:

Առաջին խաղը Կիպրոսի հետ էր: Այն որոշելու էր չեմպիոնության հարցը: Նրանք զգացին, որ մեր բասկետբոլիստները հոգեբանորեն լարված են եւ երկրորդ խաղակեսից հետո առավելություն ստացան: Մեր ուժերը սպառվել էին, բայց ոչ թե ֆիզիկապես, այլ հոգեպես: Գործնականում առանց փոխարինումների ենք խաղացել», - ասել է Հարությունյանը, մեջբերում է ՀՀ Ազգային օլիմպիական կոմիտեն:

Եվրոպայի B դիվիզիոնի առաջնությանը մասնակցում են եվրոպական 20-ից ավելի երկրներ:

Photo` Armnoc